Read KIMERU BIBLE PROTESTANT EDITION Zab 10 Bible Online

Zab 10 - KIMERU BIBLE PROTESTANT EDITION bible

Zab 10

¹Itû MWATHANI nîmbi îgûtûma ûkara kûraaja naatuî? Nîmbi îgûtûma wiciitha tûrî na thîîna?

²Barîa baaî beenganaga na nkîa na ûng'entu bagîcwaa gûciinyîîria. Tûma bagwe mîtegoone îrîa bategeetie.

³Muntû ûrîa mûûî aikumagia nîûntû bwa mairîrîîria ja nkoro yaawe, muntû ûrîa ûrî ûkoroku bwa kûgîa into atîendaga MWATHANI.

⁴Muntû ûmûûi mwikumia atîonaga gîtûmi gîa gûcwaa MWATHANI. Mathûgaanio jaawe jamwîraga rîonthe atî, “Gûtî Mûrungu.”

⁵Mantû ja muntû ûmûûî jeetaga bwega magiita jonthe; matua ja Mûrungu jarî îgûrû kûraaja nawe jatîmûkinyagîîra; nawe nî amenagîîria barîa bonthe bareganaga na bwaawe.

⁶Muntû ûmûûî athûgaanagia agaciîra atîrî, “Ûûni ntîenyeenyeka! Gûtî we ûgampûmba kenya na kenya.”

⁷ Kanyua ka muntû ûmûûî kaumaga irumi akî na nteto cia ûrongo na cia kwîîria antû bangî; rûûme rwaawe rwaragia nteto cia gûkurungana na inthûûku.

⁸Aiciithagîra antû tûtûûreene; kenda ooraga antû batî na maatia. Akaraga akûûrîte meetho eeteerete muntû ûtî na inya;

⁹eetagîîra aitumîte ta ûrîa ngatûnyi iicithagîra nyomoo; muntû ûmûthûûku eetagîîra aitumîte kenda agwata nkîa; yatonya mûtegoone jwaawe, akamîgwata.

¹⁰Muntû ûtî na inya aringagwa nthî, agakinyangwa, nî barîa barî na inya.

¹¹Ûrîa mûûî augaga nkoroone yaawe atîrî, “Mûrungu nî oorîrîîtue nî ni, nî ambutatîrîte atîkûmboona.”

¹²Njû itû MWATHANI Mûrungu; wonanie inya yaaku gwe Mûrungu; ûkoorîrua nî barîa bainyîîrîtue.

¹³Nîkî ûntû muntû ûrîa mûûî amenaga Mûrungu? Nîatîa oomba kuuga nkoroone yaawe atî, gwe ûtîmûûria?

¹⁴Gwe MWATHANI nî woonaga wengwa; nî wiijî barîa bakûthangîka bainyîîrîîtue, na gûtî nkaanja, gwe ûkabateethia. Barîa batî na inya nî bainenkanîrîte kîrî gwe, nîkwîthîrwa gwe nîgwe mûteethia wa nkîa.

¹⁵Thiria inya ya muntû ûrîa mûûî na mwîyia; mûkanûkie nîûntû bwa ûthûûku bûrîa bunthe athithîtie.

¹⁶MWATHANI agaatûûra aathanaga kenya na kenya; antû ba mîgongo îrîa îtîmwîtîkîtie no mwanka bathaamue baume nthîgûrû yaawe.

¹⁷Igua maromba ja nkîa gwe MWATHANI; bathikîîre na ûbeekîre inya.

¹⁸Thithîria aana barîa batî na aciari na barîa bainyîîrîtue mantû jarîa jaagîrîte, nîkenda batîkamakue nî muntû noo ûrîku wa nthîgûrû îîjî.