Read KIMERU BIBLE PROTESTANT EDITION Zab 102 Bible Online

Zab 102 - KIMERU BIBLE PROTESTANT EDITION bible

Zab 102

¹Itû MWATHANI, igua îromba rîaakwa, na wigue îkaya rîaakwa.

²Ûgántiganîîria ndî nthîînene, kiinda gûtû ûmbigue, ûmbîtîkage na mpwîî rîrîa ndagwîta.

³Ûtûûro bwaakwa bûthirangaga ta toogi, mwîrî jwaakwa nîka jûgwakana.

⁴Ndingi nkanyaara ta nyaki, ntîkûûmba kûrîa biakûrîa.

⁵Ndîrîte ngaceng'a; mwanka mîndîîndî îkaumîra.

⁶Nkari ta ntuuntuguru ya rwanda, ntuuntuguru îrîa îtûûraga maganjoone.

⁷Ntîonaga toro, nkari ta kanyoni gatigi gonka îgûrûgûrû rîa nyomba.

⁸Anthû baakwa batindaga gûncikûûra, barîa banthûmbagia batumagîra riîtwa rîaakwa rîrî kîrumi.

⁹Mûju nîju jweete biakûrîa biaakwa, meethori jakaungana na biakûnyua.

¹⁰Ûmbûkîîrîîtie na mûthûûro, wandingania nthî.

¹¹Ûtûûro bwaakwa bûthirangaga ntûti ta kîthiîki ûgoro, bwanyaara ta nyaki.

¹²Îndî gwe MWATHANI waathanaga kenya na kenya naagwe ûkaririkanagwa nthukîîne cionthe.

¹³Ithuranîre wigîîrue Zaiûni kîaao, nîûntû îgiita nî rîkinyi rîa kûmiigîîrua kîaao.

¹⁴Tuî nthûûmba ciaaku nî tûmîendeete na kinya yeethîrwa îmomorangi nî tûmîendeete.

¹⁵Mîgongo îgakîraga riîtwa rîa MWATHANI, anene bonthe ba nthîgûrû bakîrage inya yaawe.

¹⁶Nîkwîthîrwa MWATHANI agaaka Zaiûni, acionanie arî na mwago.

¹⁷MWATHANI akaigagua maromba ja antû baawe barîa bathangîkaga na atîmena maromba jaao.

¹⁸Nthukî irîa ikeeja nî ciandîkîrwe mantû jarîa MWATHANI aathithîtie nîkenda nchiarwa irîa ikeeja nyumeene ikumia MWATHANI.

¹⁹MWATHANI arî gîkaroone kîaawe gîkîtheru kûu îgûrû nî aaraithîîrîtie nthîgûrû arategeera nthî arî kûu îgûrû.

²⁰Araigua kîrîro kîa barîa baatheeki aroonokia barîa baagiitîri kûûragwa;

²¹nîkenda batûmagîîria riîtwa riaawe kûu Zaiûni, na bamûkumagie kûu Jerusalemu;

²²rîrîa antû ba mîgongo bakoothûrana nîkenda bathaathayia MWATHANI.

²³MWATHANI nî atûmîte ndaaga inya ndî ûmwîthî, anyiiyia ûtûûro bwaakwa.

²⁴Îtû Mûrungu waakwa, gwe ûtûûraga kenya na kenya ûkámbûraga ndî ûmwîthî.

²⁵ Kîambîrîriene nî weekîîre mîsingi ya nthîgûrû, ûrathithia îgûrû na njara ciaaku.

²⁶Îgûrû na nthî bikaathira, îndî gwe ûgaatûûra kenya na kenya. Îgûrû na nthî bikaathira ta nguû nabio bithire ta ntaame, naagwe ûbite.

²⁷Îndî gwe ûtûûraga o ûmwe ûtûûro bwaaku bûtîthiraga.

²⁸Nchiarwa cia antû baaku igatûûraga kindaajî. Antû ba rûrîîjo rwaao bagûtumîkagîre magiita jonthe.