Read KIMERU BIBLE PROTESTANT EDITION Zab 103 Bible Online

Zab 103 - KIMERU BIBLE PROTESTANT EDITION bible

Zab 103

¹Ngaakumagia MWATHANI na mwoyo jwaakwa junthe, na birîa bionthe birî ndeene yaakwa bikumagie riîtwa rîaawe rîrîa rîtheru.

²Ngaakumagia MWATHANI na mwoyo jwaakwa junthe, na ntîûrîrua nî mawega jaawe jonthe.

³Nîwe ûndekagîra meeyia, na akamboria mîrimo yonthe.

⁴Nîwe ûmbonokagia ntîgaakue na akantharima na wendo na kîaao kîrîa gîtîthiraga.

⁵Nîwe ûmbûjûragîria moobatu jaakwa na into bibiega ûtûûroone bunthe, mwanka nkaanaka na nkagîa inya ta ya ndiiû.

⁶MWATHANI akagiitîra barîa bainyagîîrua bûbwega agatûma boone îota na ûûma.

⁷We nî aamenyithanîrie mîbango yaawe kîrî Musa, na aroonia Israeli mathithio jaawe ja kûrigaria.

⁸ MWATHANI nî wa kîaao na ûtugi, atîthûûrangaga na mpwîî na wendo bwaawe bûtîthiraga.

⁹Atîkaraga agîtetaga na mûthûûro jwaawe jûtîkaraga îgiita.

¹⁰Ningî atîtûkanûkagia kûrîngana na ûrîa twîîtie bûng'ana, kana atûrîyia kûringana na maatia jeetû.

¹¹Wendo bwa MWATHANI nî bûbûnene kîrî barîa bamwîtîkîtie bûng'ana ta kuuma nthî gwitia îgûrû.

¹²Atwebagîria meeyia jeetû akajeeka kûraaja o ta ûrîa bwa gaiti kûrî kûraaja na bwa rûgûrû.

¹³Aigagîîrua barîa bamwîtîkîtie kîaao, o ta ûrîa muntû aigagîîrua aana baawe kîaao.

¹⁴Nîkwîthîrwa nî aijî kîrîa tûûmbi nakîo na akamenya tûûmbi na tîîri.

¹⁵Ûtûûro bwa muntû bûthiraga o ta nyaki, tontû akûrangaga ta maûa.

¹⁶Îndî ruuo rûjaurutaga, jakathira, jakauma o buru.

¹⁷Îndî kîaao kîa MWATHANI kîrîa gîtîthiraga, gîtûûraga kenya na kenya kîrî barîa bamûkîraga na waagîru bwaawe bûtûûraga nthukîîne cionthe.

¹⁸Nabo nî barîa bonthe boojûragia kîrîkanîro nawe, na bakaathîkîra maathana jaawe.

¹⁹MWATHANI aathanaga arî kûu îgûrû, na nîwe waathaga kunthe.

²⁰Buî araîka barîa barî inya mono, buî barîa bwathîkagîra maathana jaawe kumagieni MWATHANI.

²¹Kumagieni MWATHANI buî araîka bonthe buî bûmûtumîkagîra bûkathithia ûrîa endete.

²²Kumagieni MWATHANI, buî biûmbe biaawe bionthe, bûmûkumagie gûntû kunthe kûrîa athanaga. Ngaakumagia MWATHANI na mwoyo jwaakwa junthe!