Read KIMERU BIBLE PROTESTANT EDITION Zab 104 Bible Online

Zab 104 - KIMERU BIBLE PROTESTANT EDITION bible

Zab 104

¹Ngaakumagia MWATHANI na mwoyo jwaakwa junthe, Itû MWATHANI Mûrungu waakwa, ûrî ûmûnene; ningî ûrî ûkumio na mwago.

²Wikunîkîte na weerû ta ûrîa muntû aikunîkaga na nguû, waamba îgûrû ta ûrîa muntû aambaga îema.

³Wakîte nja yaaku îgûrû rîa rûûjî rûrîa rûrî îgûrû waaeethia matu ngaarî yaaku ya ndwaa, na ruuo nîru rûgûkamataga.

⁴ Gwe ûtumagîra ruuo ta atûmwa baaku, mwanki na ndweeni ta nthûûmba ciaaku.

⁵Nîgwe weenjîre mîsingi ûrarikia nthîgûrû kîrî yo, ûrîa îtîûmba kwenyeenyeka.

⁶Naagwe waakûnîkîre nthîgûrû na îria ta ûrîa muntû aikunîkagîra na mûrîngîti.

⁷Îndî rîrîa waagondokeere rûûjî rûramatûka rîrîa rwaigîrue îgondoka rîaaku rûraûra buru.

⁸Naru rûreenamîîra irîmeene rûraunûkîîra iguuruune, mwanka kûrîa waarûthithîrîtie rûkara.

⁹Ûrarwîkîîra mîanka îrîa rûtîbuîrîte gûkûrûka nîkenda rûtîgaakunîke nthîgûrû kaîrî.

¹⁰Ûratûma ithima biratûrîka iguuruune, mîuro îreenama kuuma irîmeene.

¹¹Ndûûjî iu nîcio inyunyagwa nî ntigiri na nyamû cia kîthaka,

¹²Nyoni ciakaga itara mîtîîne rûteere rwa ndûûjî iu ikainaga irî mpang'iine cia mîtî îîu.

¹³Uurithagia ngai kuuma îgûrû, îkaura irîmeene na nthîgûrû îkoojûra itharimo biaaku.

¹⁴Ûtûmaga nyaki îkauma îkarîîwa nî ndîîthia antû bakarîma na mîmera bakoona biakûrîa.

¹⁵Kûrîma nî kwonagîra antû ndibei ya kûbagwîria na bakoona maguta ja nzeituni ja gwaka, na bakoona biakûrîa bia kûbeekîra inya.

¹⁶Mîtarakwa ya nthîgûrû ya Lebanoni nî ya MWATHANI nîwe ûmîîkagîra rûûjî rwa kûng'ana.

¹⁷Mîtarakweene îîu nîku nyoni ciaakaga itara mîthithinda îkaa nja ya namîtoori.

¹⁸Nkûrûngû itûûraga irîmeene birîa inene, ngaara igaiciitha rungu rwa maiga.

¹⁹Woombîre mweri nîkenda jûtûmenyithagia bingo, na riûa nî riijî rîrîa rîbuîri kûthwa.

²⁰Nîgwe wombîre muundu, gwatuka nyamû cionthe îkaumîra ithakeene.

²¹Ngatûnyi iruumaga igîcwaa gîa kûrîa ikeerîgîîra Mûrungu acionia ndûmo.

²²Îndî gwakea, igacoka imamoone biaacio.

²³Nabo antû beetaga kûrita ngûgî bagatinda kûmîrita mwanka ûgoro.

²⁴Itû MWATHANI, ûûmbîte into bibingî na ûûme, nthîgûrû yonthe yûjûri biûmbe biaaku.

²⁵Ningî kînya îrieene rîrîa înene buru, kûrî biûmbe bibingî; binene na binini.

²⁶ Nîkû meri cietagîîra, na nyamû ya rûûjî îrîa îtagwa Leviathani, nîku îîtagîîra.

²⁷Biûmbe biu bionthe nîgwe MWATHANI biîrîgagîîra, ûbicwîra ndûmo rîrîa birî na ûbatu.

²⁸Ûbinenkagîra ndûmo nabio bikarîa, wabicwîra gîa kûrîa, bikarîa bikanyira.

²⁹Ûkëeja kûbiîrûkîra nîka bimakaga, wabiingîîra mîrukî, bigakua na bigacoka mûthetuune kûrîa biaumîre.

³⁰Waabiûmbîre bionthe na Roho waaku, nîgwe weerwagia ûtûûro bwa aja nthîgûrûûne.

³¹Mwago jwa MWATHANI jûrootûûra kenya na kenya, MWATHANI arogwîrîrua birîa oombîte.

³²MWATHANI araithagîîria nthîgûrû îgateetema atonga irîma, bikauma toogi.

³³Nkainagîra MWATHANI ûtûûroone bwaakwa bunthe, nkumagie Mûrungu waakwa bunka ndî mwoyo.

³⁴MWATHANI aroigua îromba rîaakwa, nîûntû nîwe ûtûmaga ngwîrua.

³⁵Eeyia barothirua nthîgûrûûne, barîa baaî bakathira buru. Ngaakumagia MWATHANI na mwoyo jwaakwa junthe! Kumieni MWATHANI!