Read KIMERU BIBLE PROTESTANT EDITION Zab 105 Bible Online

Zab 105 - KIMERU BIBLE PROTESTANT EDITION bible

Zab 105

¹Kaathageeni MWATHANI na bûrombage riîtweene rîaawe bûmenyithanagie ûrîa athithîtie kîrî antû bonthe.

²Mwinagîreeni na bûmûkumagie bwîranage mantû ja kûrigaria jarîa athithîtie.

³Kumagieni riîtwa rîaawe rîrîtheru buî bwinthe barîa bûthaathagia MWATHANI.

⁴Îrîgagîîreeni MWATHANI na bwîrîgagîîre inya yaawe bûmûthaathagie magiita jonthe.

⁵Ririkanageeni mantû ja kûrigaria jarîa athithîtie bûririkanage biama birîa aathithia na ûrîa aagiitanagîra magamba ûrîa kwagîrîte.

⁶Buî bûrî ba rûrîîjo rwa Abrahamu ûrîa nthûûmba ya MWATHANI, buî nchiarwa cia Jakubu ûrîa aathuurîte.

⁷We nîwe MWATHANI Mûrungu weetû nayo nthîgûrû yonthe nî iijî ûrîa agitîte.

⁸Magiita jonthe nî aririkanaga kîrîkanîro kîrîa eekîte, na akaririkana wîrane bwaawe kinya nyuma ya nthukî ngiri.

⁹ Nakîo nî kîrîkanîro kîrîa eekanîîre na Abrahamu, na wîrane bûrîa eerîte Isaaka.

¹⁰ MWATHANI nî aarikithîrie kîrîkanîro kîu kîrî Jakubu ararikithîria antû ba Israeli kîrîkanîro kîrîa gîtîkorothira.

¹¹Aramwîra atîrî, “Ngaakwaa nthîgûrû ya Kanaani yee kiigai gîaaku.”

¹²Îgiita rîu Aisraeli baarî babakai na baarî ageni nthîgûrûûne ya Kanaani.

¹³Beetaga kuuma nthîgûrû îmwe gwîta îngî bageeta kuuma waathaniine bûmwe mwanka bûngî.

¹⁴ Îndî Mûrungu ateetîkîîria muntû no ûrîkû abainyîîria; na nî aakaanagia anene batîkabathithîrie bûbûûî.

¹⁵Akauga atîrî, “Bûkáthithîria antû baakwa barîa nthuurîte bûbûûî kana bûringithia iroria biaakwa.”

¹⁶ Mûrungu nî aatûmîre kûgîa mpara nthîgûrû na aatûma baraaga biakûrîa buru.

¹⁷ Ningî nî aatûmîte Josefu areeta Misri mbere yaao, kûrîa eenderue arî nkombo.

¹⁸ Aatheeki magûrû na nyororo akaigua mûrimo mono na akatheekwa nkingo na gîchooki gîa chuuma.

¹⁹Josefu aakarîre ûu mwaka mantû jarîa aarîîtie jaroojûra rûteto rwa MWATHANI rûroonania nî aarî ûûmeene.

²⁰ Mûnene aratûmana Josefu arekeerua mûtongeeria wa nthîgûrû îîu aramûrita ncheera.

²¹ Aramweethia mûtongeeria wa Misri na mûrûngamîîri wa into biaayo.

²²Araeewa waatho bwa kûritanaga atongeeria na kûbaeejaga kîrîra.

²³ Jakubu nî eetîre Misri, aratûûra ku arî mûgeni

²⁴ MWATHANI aratûma antû baawe bathegea mono, na aratûma baragîa na inya nkûrûki ya anthû baao.

²⁵Ningî nî aatûmîre antû ba Misri barathûûra antû baawe. Barathithîria nthûûmba ciaawe mantû jamathûûku.

²⁶ MWATHANI nî aatûmîre nthûûmba ciaawe Musa na Aaroni, barîa aathuurîte.

²⁷Nabo barathithia mantû ja kûrigarania kûu Misri bararinga biama.

²⁸ MWATHANI aratûma muundu kûu nthîgûrûûne ya Misri kûratuka, îndî antû baayo batamwigîrue.

²⁹ Aragarûra ndûûjî ciaao iraa tharike, na aratûma makûyû jaao jarakua.

³⁰ Biûra biraingîa biroojûra nthîgûrûûne yaao kinya gîkaroone kîa mûnene waao.

³¹ MWATHANI ararita waatho mîrumbî ya ngii na rwagî biroojûra nthîgûrûûne kunthe.

³² Aratûma baraurîrwa nî ngai ya ncugu ndweni ikîenagia kunthe.

³³Nî aathûkangîrie mîtî yaao yonthe arathiria mîzabibû na mîkûû nthîgûrûûne kunthe.

³⁴ Nî aaritîre Waatho, ngigî inyiingî ûrîa itîngî gûtarîka ireeta ku.

³⁵Nacio irarîa bunka mûtî jûmworo irarîa imera bionthe.

³⁶ Nî ooragîre tuîjî twaao twa kîranga tunthe aratûthiria buru.

³⁷ Nyumeene aratongeeria antû ba Israeli barauma Misri bareeta bakamatîte fetha na thaabu na gûtî waao waatigîrwe.

³⁸Antû ba Misri nî baagwîrîrue mono rîrîa antû ba Israeli baaumîre nthîgûrûûne yaao nîûntû nî baabakîraga.

³⁹ Mûrungu nî aakunîkagîra antû baawe na îtu na ûtukû akabamûrîkîra.

⁴⁰ Rîrîa baamûrombere biakûrîa, Mûrungu nî aabatûmîîre nkware. Arabanyiria na mîgaate kuuma îgûrû.

⁴¹ Nî aathûranîre iiga, rûûjî rûrauma ku, naru rûûjî rûraa mûuro jûreeta bwa rwanda.

⁴²Nîkwîthîrwa nî aaririkanîre wîrane bûbûtheru bûrîa eerîte nthûûmba yaawe Abrahamu.

⁴³Tontû bûû, aratongeeria antû baawe barauma Misri bagwîrîtue, antû barîa aathuurîte bareeta bakiinaga.

⁴⁴ Arabanenkera nthîgûrû cia mîgongo îngî, na barajûkia into birîa antû bangî baathithinîrîte;

⁴⁵nîkenda antû baawe baathîkagîra maathana jaawe na bathingataga Waatho bwaawe. Kumagieni MWATHANI!