Read KIMERU BIBLE PROTESTANT EDITION Zab 106 Bible Online

Zab 106 - KIMERU BIBLE PROTESTANT EDITION bible

Zab 106

¹ Kumagieni MWATHANI na bûmûcokagîrie nkaatho! Nîkwîthîrwa nî ûmwega na gûtî rîo wendo bwaawe bûthiraga.

²Nûû ûûmba kwîrana mantû jamanene jarîa MWATHANI athithîtie, kana nûû ûûmba kûmûkumia bwa kûng'ana?

³Kîtharimo nî kîrî barîa bathithagia mantû ja îota, barîa bathithagia mantû ja waagîru magiita jonthe.

⁴Itû MWATHANI, ûndirikane rîrîa ûkoonia antû baaku kîaao ûnteethie ûkîboonokia.

⁵Nîkenda kinya ni nthinyaara antû barîa ûthuurîte bakîthinyaara, na nîkenda ngwîranîrua na antû baaku ngûkumagie amwe na barîa barî baaku.

⁶Tuî nî twîîtie o ta ûrîa biûjûjû bieetû bieeîrie; twathûûkia twathithia mantû jamaaî.

⁷ Rîrîa biûjûjû bieetû biaarî Misri, batathûganagia bwa mantû ja kûrigaria jarîa wathithîrie na bataririkanaga ûrîa waabeendeete mono. Îndî nîka baaregere gûkwathîkîra gwe Ûrîa Ûrî Îgûrû buru rîrîa baakinyîre Îria Îtuune.

⁸Îndî we nî aaboonokerie nîûntû bwa riîtwa rîaawe, nîkenda abamenyithia ûrîa arî inya înene.

⁹ Nî aagondokeere Îria Îtuune narîo rîranyaara, nawe arabatongeeria barakûrûkîîra ku kûrî nthî înjûmo.

¹⁰Tontû bûû, araboonokia kuuma kîrî anthû arabatunyûkia kuuma kîrî barîa babathwîre.

¹¹Naru rûûjî rûrakunîkania anthû baao na gûtî noo ûmwe waao waatigarîre.

¹² Nabo Aisraeli bareetîkia wîrane bwaawe baramwinîra bakîmûkumagia.

¹³Îndî bo baroorîrua ntûti nî mantû jarîa aathithîtie, na bateetereere Mûrungu abaa kîrîra.

¹⁴ Nabo nî baakorokeere biakûrîa rîrîa baarî bûûrîîne barageria Mûrungu barî rwanda.

¹⁵Tontû bûû, arabathithîria ûrîa beendaga îndî aracoka arabareetera mûrimo jûmûthûûku.

¹⁶ Antû barîa baarî kambîîne nî baigîrîîrue Musa rûriitho, na baraigîîrua Aaroni tawe nthûûmba ya MWATHANI rûriitho.

¹⁷Nayo nthîgûrû îraathûkana îrameria Dathani na Abiramu amwe na antû bangî barîa baarî nawe.

¹⁸Naju mwanki jûraîîthia athingatî baao naju jûrathiria antû bau baaî.

¹⁹ Nî baathithîrie kajaû karî mûrungu jwa mûng'uanano kûu Sinai na barakathaathayia.

²⁰Baratiga gûkumia Mûrungu barambîrîria kûthaathayia mûng'uanano jwa ndeegwa.

²¹Baroorîrua nî Mûrungu Mwonokia waao, ûrîa wathithîtie mantû ja kûrigaria Misri.

²²Baroorîrua nî mantû ja kûrigaria jarîa aathithîrie ku na mantû ja kûmakania jarîa aathithîrie barî Îrieene Îtuune.

²³Tontû bûû, arauga akaabathiria, îndî nthûûmba yaawe, Musa, îramwerenca atîkaabathirie.

²⁴ Nabo barameneeria nthîgûrû îrîa aabaeejaga na baratiga gwîtîkia wîrane bwaawe.

²⁵Baranung'una barî maemeene jaao na bataathîkîîre MWATHANI.

²⁶Tontû bûû, arabaciîtîria atî agaatûma bathirîre rwanda,

²⁷ na atî akaanyagia nchiarwa ciaao nthîgûrûûne ingî kunthe.

²⁸ Nabo nî baambîrîîrie kûthaathayia Baali taju mûrungu jwa mûng'uanano jwa Peori na bararîa igongwana birîa biaaritîri mîrungu ya mîng'uanano îtî mwoyo.

²⁹Mathithio jaao jaratûma MWATHANI athûûra na mûrimo jûmûthûûku jûrabeejîîra.

³⁰Îndî Fineasi arakanûkia barîa baarî na maatia naju mûrimo jûrathira.

³¹Nabu ûntû bûu, bûratûma aroonekana arî ûmwagîru nthukîîne cionthe.

³² Antû nî baathûûrîrie MWATHANI barî rûûjîîne rwa Meriba baratûma Musa arakanûkua nîûntû bwaao.

³³Baratûma Musa araaria na mûthûûro araaria mantû ataabuîrîte kuuga.

³⁴ Ningî bataathirîrie antû ba mîgongo îngî ta ûrîa MWATHANI aabeerîte.

³⁵Îndî baunganîre na antû ba mîgongo îîu Aisraeli barairitana mîtûûrîre ya antû bau.

³⁶Barathaathayia mîrungu ya mîng'uanano ya antû bau nayo îraa mîtego ya kûbategia.

³⁷ Nabo bararita aana baao ba aarî na nthaka barî igongwana kîrî mîrungu ya mîng'uanano.

³⁸ Barooraga aana baao barîa bataarî na maatia rîrîa baabaritîre barî igongwana kîrî mîrungu ya mîng'uanano ya Kanaani bareekîra nthîgûrû mûgiro.

³⁹Nabo baraciîkîra mûgiro na mantû jarîa baathithagia bararega kwaa eetîkua kîrî Mûrungu.

⁴⁰ Tontû bûû, MWATHANI arathûûra nîûntû bwa antû baawe, aramena antû barîa aithuurîrîte.

⁴¹Aratûma baroombwa nî anthû baao baraathwa nî antû ba mîgongo îngî.

⁴²Anthû baao baabaathaga babainyîrîtie buru.

⁴³Magiita jamaingî MWATHANI nî aabatunyûkagia kuuma kîrî anthû îndî bo bararega kûmwathîkagîra, baratonya meeyiene nkûrûki.

⁴⁴Amwe na bûu MWATHANI nî aabaigîrue rîrîa baamûkaîîre barî thîîneene.

⁴⁵Nabo nî baatûmîre araririkana kîrîkanîro kîaawe aratiga kûbathithîria ûthûûku nîûntû bwa kîaao kîaawe kîrîa gîtîthiraga.

⁴⁶Aratûma antû barîa baabaathaga bonthe barabaigîîrua kîaao.

⁴⁷ Twonokie, itû MWATHANI Mûrungu weetû, na ûtûcokanîîrie kuuma mîgongoone îrîa îtwathaga, nîkenda tûkaathaga riîtwa rîaaku rîrîa rîtheru, na tûkûgongaga.

⁴⁸Kumagieni MWATHANI Mûrungu wa Israeli bûmûkumagie kenya na kenya! Antû bonthe nî bauge, “Amen!” Kumagieni MWATHANI!