Read KIMERU BIBLE PROTESTANT EDITION Zab 107 Bible Online

Zab 107 - KIMERU BIBLE PROTESTANT EDITION bible

Zab 107

¹ Kumagieni MWATHANI na bûmûcokagîrie nkaatho nîkwîthîrwa nî ûmwega na gûtî rîo wendo bwaawe bûthiraga.

²Barîa boonokeetue nî MWATHANI nî baugaga nteto iu nabo barîa atunyûkîîtie kuuma thîînene.

³Ningî nî barîa acokanîîrîtie kuuma nthîgûrûûne ingî, kuuma bwa gaiti na kuuma bwa rûgûrû, na kuuma bwa ûrîo na kuuma bwa ûmotho.

⁴Bamwe baûrîîre rwanda bararemwa nî kûmenya njîra ya gûcoka ntûûreene batûûra ku.

⁵Baarîîrwe nî mpara na barooragwa nî nyoonta barathira wîrîgîîro buru.

⁶Rîrîa baakaîîre MWATHANI barî thîîneene MWATHANI nî aaboonokerie kuuma mîthangîkoone yaao.

⁷Arabatongeeria na njîra itî kîthioro mwanka barakinya ntûûreene kûrîa baatûûrîre.

⁸Babuîrîte gûcokagîria MWATHANI nkaatho nîûntû bwa kîaao kîaawe kîrîa gîtîthiraga na nîûntû bwa mantû ja kûrigaria jarîa abathithagîria.

⁹Nîkwîthîrwa MWATHANI nî anyoontoraga barîa barî na nyoonta na akanyiria barîa barî na mpara na into bibiega.

¹⁰Antû bamwe baakaraga muunduune na baatheeki ncheera na nyororo.

¹¹Nîkwîthîrwa nî baaregeete kwathîkîra ûrîa Mûrungu aabeerîte bararega kîrîra kîa Ûrîa Ûrî Îgûrû buru.

¹²Nabo baaritithagua ngûgî cia inya bagwa bationaga wa kûbookîîria.

¹³Nabo barakaîra MWATHANI barî thîînene, nawe araboonokia kuuma mîthangîkoone yaao.

¹⁴Arabarita kuuma muunduune jûmûnene na aragiitanga nyororo ciaao.

¹⁵Babuîrîte gûcokagîria MWATHANI nkaatho nîûntû bwa kîaao kîaawe kîrîa gîtîthiraga na nîûntû bwa mantû ja kûrigaria jarîa aabathithîrîtie.

¹⁶MWATHANI nî aunangîre mîari ya îturutia na araunanga miingo ya chuuma.

¹⁷Bamwe baaere biaa nîûntû bwa meeyia jaao barathangîka mono nîûntû bwa meeyia jaao.

¹⁸Bararemwa nî kûrîa biakûrîa bia mîthemba yonthe, nîûntû baarî beco gûkua.

¹⁹Nabo barakaîra MWATHANI barî thîînene nawe araboonokia kuuma mîthangîkoone yaao.

²⁰Ararita Waatho baroorua mîrimo araboonokia gîkuûne.

²¹Babuîrîte gûcokeria MWATHANI nkaatho nîûntû bwa kîaao kîaawe kîrîa gîtîthiraga na nîûntû bwa mantû ja kûrigaria jarîa abathithîrîtie.

²²Babuîrîte kûritagîra MWATHANI igongwana bia nkaatho bakaiina ndwîmbo bagwîrîtue bagîkumagia mantû jarîa athithîtie.

²³Antû bamwe beetaga îrieene barî meriine bageeta kûringa biashara.

²⁴Nabo nî boonaga mantû jarîa MWATHANI athithagia, bakoona mantû ja kûrigaria jarîa athithagia îrieene.

²⁵Nîkwîthîrwa aaragia kîbuubani gîkînene gîkaurutana, nayo mîgombe îkaringana îrieene.

²⁶Meri iu ciageragwa nî mîgombe îgûrû na cikeenamua nîyo nabo antû barîa beethagîrwa barî ku bakathirîrwa nî ûchamba.

²⁷Baramaka baratang'atang'a ta antû boogiti barathirîrwa nî ûûme buru.

²⁸Nabo barakaîra MWATHANI barî thîîneene nawe araboonokia kuuma mîthangîkoone yaao.

²⁹Arathiria kîbuubani nayo mîgombe îratiga kûringana.

³⁰Narîo îria rîkûborera, baragwîrua mono bareeta barakinya mpwîroone kûrîa beetîte arîa beendaga gwîta barî thîîria.

³¹Babuîrîte gûcokeria MWATHANI nkaatho nîûntû bwa kîaao kîaawe kîrîa gîtîthiraga, na nîûntû bwa mantû ja kûrigaria jarîa abathithagîria.

³²Babuîrîte gûkaathaga MWATHANI rîrîa boothûranîte na atongeeria bamûkumagie boothûrana.

³³Nî aatûmîre ndûûjî inyaara na ithima biûmagara buru.

³⁴Miuunda îrîa yaanori îroonda nîûntû antû barîa baatûûraga ku nî baathithagia mantû jamathûûku.

³⁵MWATHANI aratûma ndwaanda ireethîrwa irî na ndûûjî na gûntû kûrîa kwomagari kûrauma ithima.

³⁶Kûu nîku antû bau baarî na mpara beetîre baraaka ntûûra cia gûkara.

³⁷Bararîma miuunda, baraanda mîzabibû na baraketha maketha jamaingî.

³⁸MWATHANI arabatharima barathegea; na aratûma ndîîthia ciaao ciongeereka.

³⁹Anthû baao baboombaga ndweene bakabameneeria na bakabainyîîria mono.

⁴⁰MWATHANI nî aamenagîîria atongeeria ba anthû baao aratûma baraûrîra rwanda.

⁴¹Îndî aratunyûkia barîa baainyagîîrua nî thîîna aratûma nchiarwa ciaao ithegea ta ndîîthia.

⁴²Barîa baagîru boona mantû jau nîka baagwîragua; îndî barîa baaî bagakira bakaaga bwa kuuga.

⁴³Antû barîa boome nî bathûgaanîrie mantû jau; baathûgaanîrie ûrîa wendo bwa MWATHANI bûrîa bûtîthiraga bûkari.