Read KIMERU BIBLE PROTESTANT EDITION Zab 108 Bible Online

Zab 108 - KIMERU BIBLE PROTESTANT EDITION bible

Zab 108

¹Itû Mûrungu ngwîtîkîtie mono. Ngakwinagîra ndwîmbo cia gûgûkumia na nkoro yaakwa yonthe.

²Ngokîîra njûkie wandîîndî na kînanda kîa ndigi inyingî, mbine mwanka gûkîe.

³Ngaagûcokagîria nkaatho itû MWATHANI ndî gatîgatîîne ga kîrîndî. Ngaakwinagîra ngîgûkumagia ndî gatîgatîîne ka mîgongo.

⁴Nîkwîthîrwa kîaao gîaaku nî gîkînene gitîtie gîakinya îgûrû, na gwîtîkîka gwaaku gwakinya matuune.

⁵Itû Mûrungu, ûrokumagua kûu îgûrû na nthîgûrû îkoojûra ûkumio bwaaku.

⁶Igua maromba jeetû tuî tûkwendeete ûtwonokie na inya yaaku na ûtwee ûûmbani.

⁷Mûrungu aarîrie arî kîûrûûne kîaawe arauga atîrî, “Nkoombana na ngaanie ntûûra ya Shekemu na ngaanie kîguuru gîa ntûûra ya Sukothi ichunchî ichunchî ngaîre antû baakwa.

⁸Gileadi nî yaakwa na kinya Manase nî yaakwa. Efuraimu nî nkobia ya îthaga yaakwa ya gwikaria nayo na Juda nî rûturo rwaakwa rwa ûnene.

⁹Edomu nîku nditagîra iraatû nkathamba magûrû Moabu, kwonania cio-ijîîrî nî ciaakwa. Ngakuura ndoomba Filisti.”

¹⁰Nûû ûgantongeeria ambikie ntûûreene irîa mbirigîre ya nthîgûrû ya Edomu?

¹¹Nîka ûtûthûûrîte buru itû Mûrungu, watîîjîra njûûrî cieetû?

¹²Tûteethie tûûmbe anthû beetû nîûntû ûteethio bwa muntû nî bwa ûtheri.

¹³Mûrungu arî rûteere rweetû tûkoombana tûûmbe anthû beetû buru.