Read KIMERU BIBLE PROTESTANT EDITION Zab 109 Bible Online

Zab 109 - KIMERU BIBLE PROTESTANT EDITION bible

Zab 109

¹Itû Mûrungu, gwe nîgwe nkumagia, tiga gûnkirîra.

²Antû babaaî na arongo nî bambithûkîîre bagîmpandagîîra ûrongo.

³Bambithûkîrîte gûtî na gîtûmi bakîaragia nteto ciaakwa imbîî.

⁴Kinya këethîra nî mbeendeete na nî mbarombagîra bo batîaragia ciaakwa injega.

⁵Mbathithagîria wega nabo bakanthithîria ûthûûku ndabeenda bakamena.

⁶Thuura muntû ûmûûî amûgambithie, ûcwee mûnthû waakwa amûtuîrîîre ûrongo.

⁷Wamûgambithia, no mwanka ûmwoone arî na maatia akûromba eethia maromba jaawe nî gîntû gîkîthûûku.

⁸ Mûthirie buru nawe muntû ûngî ajûkie into bwaawe.

⁹Aana baawe barokuîrwa nî îthe na mwekûrû waawe akaa ntigwa.

¹⁰Aana baawe baroaga gîtûûro barwengwa buru kuuma maganjoone.

¹¹Barîa arî na îraandû rîaao barataa into biaawe, na akûrûki na njîra barojûkia rûmaatho rwaawe.

¹²Gûkorooneka muntû wa kûmwigîîrua kîaao kana wa gûteethia aana baawe barîa bakuîri nî îthe.

¹³Nchiarwa ciaawe irothira cionthe na riîtwa rîaawe rîkoorîria kîrî nthukî irîa ikathingata.

¹⁴MWATHANI aroririkana meeyia ja biûjûjû biaawe, na akororekera meeyia ja ng'ina.

¹⁵MWATHANI aroririkana meeyia jaao magiita jonthe, na agatûma bakoorîria buru nthîgûrûûne.

¹⁶Nîkwîthîrwa gûtî rîo aigîîrua nkîa kîaao îndî nîka ainyagîîria na akooraga athîîni na thebe.

¹⁷Nîkwîthîrwa nî eendeete bangî bagwatwa nî kîrumi mono arogwatwa nî kîrumi; na nîûntû ataatharimanaga, aroaga kîtharimo.

¹⁸Aagarûragîra irumi o ta ûrîa muntû aagarûraga nguû, irumi biu biromûtonya ta ûrîa rûûjî rûtonyaga nguûûne, kana ta ûrîa maguta jatonyaga mwîrî.

¹⁹Arwekagîra kîrumi ta nguû agaciogaga kîo ta mûcibi.

²⁰Jûu jûrooaa mûchaara jwa anthû baakwa kuuma kîrî MWATHANI nabo nî barîa baaragia mantû jaakwa jamathûûku.

²¹Îndî gwe, itû MWATHANI Mûrungu waakwa thithia ûu nîûntû bwa riîtwa rîaaku antûûne aakwa. Ntunyûkia nîûntû wendo bwaaku nî bwa mma.

²²Nîkwîthîrwa ndî nkîa îrî na ûbatu na nî nthîînîte mono.

²³Ûûni nkûthira ta ûrîa kîthiîki kîthiraga riûa rîathûa nkari ta ngigî yuruti nî ruuo.

²⁴Maru jaakwa nî jaagîîte inya nî gûciata biakûrîa, nceng'eete ndaatigwa mîndîîndî akî.

²⁵ Anthû baakwa bambonaga bakatheka, bakainainia mîtwe bagîncikûûra.

²⁶Itû MWATHANI Mûrungu waakwa nteethia! Mbonokia nîûntû bwa wendo bwaaku bûrîa bûtîthiraga.

²⁷Tûma anthû bamenye atî nîgwe ûmbonokeetie.

²⁸Anthû nî bandume tu, îndî gwe ntharima. Barîa bambithûkagîra barocokerwa nî nthao îndî ni nthûûmba yaaku nkare ngwîrîîtue.

²⁹Barîa banthitangaga baroojûrwa nî nthao barweekîra nthao ta ûrîa muntû eekagîra nguû ya îgûrû.

³⁰Naani ngakaathaga MWATHANI mono, mûkaathagîre kîûthûranoone kîa antû baawe.

³¹Nîkwîthîrwa nîwe ûtetagîîra barîa barî na ûbatu akoonokia barîa bagiitîri kûûragwa.