Read KIMERU BIBLE PROTESTANT EDITION Zab 115 Bible Online

Zab 115 - KIMERU BIBLE PROTESTANT EDITION bible

Zab 115

¹Tî tuî tûbuîrîte gûkumagua, Îndî nî riîtwa rîaaku rîbuîrîte gûkumagua itû MWATHANI, nîûntû kîaao gîaaku gîtîthiraga na ûrî mwîtîkua.

²Nîmbi îgûtûma mîgongo îrîa îtîkwijî îtûûria, “Arîkû Mûrungu weenu?”

³Mûrungu weetû arî îgûrû athithagia ûrîa akwenda.

⁴ Mîrungu ya mîgongo îîu, îthithîtue nî antû, nî ya fetha na thaabu.

⁵Îrî tûnyua, îndî îtiaragia, îrî meetho, îndî îtîonaga.

⁶Îrî matû, îndî îtiigagua, îrî nyiûrû, îndî îtînuunkagîra.

⁷Îrî njara, îndî îtîtongatongaga, îrî magûrû, na îtîîtaga, na gûtî u yûmba kuuga.

⁸Barîa baamîthithîrie bakari o ta yo, na barîa bonthe bamîîtîkagia, bakari ta yo.

⁹Îbuî antû ba Israeli îtîkagieni MWATHANI, nîûntû nîwe ûbûteethagia na akabûkaria.

¹⁰Naabuî ba rûrîîjo rwa Aaroni îtîkagieni MWATHANI nîûntû nîwe ûbûteethagia na akabûkaria.

¹¹Buî barîa bûthaathagia MWATHANI mwîtîkagieeni, nîûntû nîwe ûbûteethagia na akabûkaria.

¹²MWATHANI nî atûririkanaga na agatûtharima, akatharima antû ba Israeli, na akatharima antû ba rûrîîjo rwa Aaroni.

¹³ Akatharima bonthe barîa bamûthaathagia, bëethîrwa barî nkîa kana itonga.

¹⁴MWATHANI arotûma bûkathegea buî na nchiara cieenu.

¹⁵MWATHANI arobûtharima we ûrîa wombîre îgûrû na nthî.

¹⁶Îgûrû nî rîa MWATHANI, nayo nthîgûrû amînenkanîra kîrî antû.

¹⁷Barîa bakuîte batîûmba gûkumia MWATHANI barîa barî gwa akuû batîûmba kûmûkumia.

¹⁸Îndî tuî tûrî mwoyo nî tuî tûkaamûkumagia kuuma nandî mwanka kenya na kenya. Kumagieni MWATHANI!