Read KIMERU BIBLE PROTESTANT EDITION Zab 116 Bible Online

Zab 116 - KIMERU BIBLE PROTESTANT EDITION bible

Zab 116

¹Mpendeete MWATHANI nîûntû nî aigagua maromba jaakwa, ndamûkaîra nî ambigagîîrua kîaao.

²Nîkwîthîrwa nî aigagua maromba jaakwa, nkaamûromba bunka ndî mwoyo.

³Nthiûrûkîri nî ûgwati nteere cionthe, ndagwatwa nî mûrimo ta jwa gîkuû; nî ndaarî ndîkûûmbwa nî kîeba na kîmako.

⁴Rîu ndîrakaîra MWATHANI nkîmwîraga, “Itû MWATHANI ndakwerenca mbonokia.”

⁵MWATHANI nî wa ûtugi na nî ûmwagîru, Mûrungu weetû arî kîaao.

⁶MWATHANI nîwe ûkaragia barîa batî inya, ûûni rîrîa ndaarî thîîneene nî aambonokerie.

⁷Ûûni nkaanogoka buru, nîûntû MWATHANI nî anthithîrîtie mantû jameega.

⁸MWATHANI nî andigîîrîtie ntîkagiitare ampangûra meethori na ambonokia ntîgaakue.

⁹Ntûûraga ndî ûkarieene bwa MWATHANI rîrîa ndî mwoyo.

¹⁰ Kinya rîrîa ndaaugaga atîrî, “Nkûthira” no ndeetîre na mbere gwîtîkia MWATHANI.

¹¹Îndî rîrîa ndaamakîte ndaaugaga: “Gûtî muntû mwîtîkua.”

¹²Nîmbi nkaritîra MWATHANI, nîûntû bwa mawega jaawe jonthe jarîa anthithîrîtie?

¹³Nkaamûritîra kîgongwana kîa ndibei, mûcokerie nkaatho nîûntû bwa kûmbonokia.

¹⁴Nkoojûragia mîciîtio yaakwa kîrî MWATHANI, ndî kîûthûranoone kîa antû baawe.

¹⁵Gîkuû kîa muntû ûmwagîru kîrî gîtûmi kîrî MWATHANI!

¹⁶Itû MWATHANI, ni ndî nthûûmba yaaku, na ngûtumîkagîra o ta ûrîa maama aagûtumîkagîra; naagwe nî ûmbonoketie kuuma gîkuûûne.

¹⁷Ngaakûromba na ngakûritîra kîgongwana gîa gûcokia nkaatho.

¹⁸Nkoojûragia mîciîtio yaakwa kîrî MWATHANI, ndî kîûthûranoone kîa antû baawe.

¹⁹Nkaathithagia ûu ndî kîaragoone gîa kîûrû kîrîa kîrî Jerusalemu. Kumagieni MWATHANI.