Read KIMERU BIBLE PROTESTANT EDITION Zab 118 Bible Online

Zab 118 - KIMERU BIBLE PROTESTANT EDITION bible

Zab 118

¹ Cokagîrieni MWATHANI nkaatho, nîûntû nî ûmwega; kîaao kîaawe nî gîa kenya na kenya.

²Antû ba Israeli nî bauge, “Kîaao kîaawe nî gîa kenya na kenya.”

³Nchiarwa cia Aaroni nî ciuge “Kîaao kîaawe nî gîa kenya na kenya.”

⁴Ka barîa bakîraga MWATHANI baugage, “Kîaao kîaawe nî gîa kenya na kenya.”

⁵Ndî mîthangîkoone nî ndaakaîîre MWATHANI nawe arambigua arantunyûkia.

⁶ Ndî na MWATHANI, ntîkîra, nîatîa muntû anthithia?

⁷MWATHANI nî eethagîrwa arî amwe naani agînteethagia, naani nkoona barîa banthûûraga bakîûmbwa.

⁸Nî kaaba kwîrîgagîîra MWATHANI, nkûrûki ya kwîrîgîîra muntû.

⁹Nî kaaba kwîrîgîîra MWATHANI, nkûrûki ya kwîrîgîîra mûtongeeria.

¹⁰Anthû ba mîgongo yonthe nî baanthiûrûkîrîte îndî inyeene ya MWATHANI, nî ndaabathirîrie bonthe.

¹¹Bo baanthiûrûkîrîte nteere cionthe îndî inyeene ya MWATHANI, nî ndaabathirîrie bonthe.

¹²Anthû baanthiûrûkîrîte ta njûkî, nabo barathira ta mwanki jwa ndagara; îndî inyeene ya MWATHANI nî ndaabathirîrie bonthe.

¹³Ndaaithûkîri nî anthû mono na nî ndaarî akuî kûûmbwa îndî MWATHANI aranteethia.

¹⁴ Mbinagîra MWATHANI mbîtîte ndweene agampa inya nawe nî ambonokagia.

¹⁵Thikîîra nkuuro cia ûûmbani ikiuma kîrî antû ba Mûrungu weetû; bakiugaga atîrî, “MWATHANI anthithîrîtie mantû jaja na inya yaawe înene.

¹⁶Inya yaawe nîyo îtûreetagîra ûûmbani, inya îîu yaawe nîyo yûmbanaga ndweene.”

¹⁷Ntîkua îndî ngatûûra mwoyo nîkenda ntûmagîîria mathithio ja MWATHANI.

¹⁸MWATHANI nî ankanûkîtie mono, îndî ataarekeeria mbûragwa.

¹⁹Ndugûrîra mpingîro cia kîûrû, nkûrûke ku ngacokerie MWATHANI nkaatho.

²⁰Îîjî nîyo mpingîro ya MWATHANI, îrîa îkûrûkagîîrwa nî barîa baagîrîte.

²¹Nî ngûgûcokeria nkaatho MWATHANI, nîûntû bwa kwigua maromba jaakwa, nîkwîthîrwa nî ûmbonokeetie.

²² Iiga rîrîa aaki baaregere nîrîo rîeete rîa koona.

²³Ûntû bûu nî MWATHANI ûthithîtie, na bwonekaga bûrî bûbwega mono.

²⁴Îîjî nîyo ntukû îrîa MWATHANI athithîtie, tûmîkûngwîreeni tûgwîrîtue!

²⁵ Itû MWATHANI nî tûgûkwerenca ûtwonokie, itû twee ûûmbani.

²⁶ Kîtharimo nî kîrî ûrîa ûkûrûkaga kîûrûûne riîtweene rîa MWATHANI. Tuî tûkûtharimaga tûrî kîûrûûne.

²⁷MWATHANI nîwe Mûrungu, na nî atûmîte twona weerû. Bagwete mpang'i cia mîkîîndû bakîthiûrûkaga kîritîro kîa igongwana bagîkûngwagîra mambura.

²⁸Mûrungu waakwa, ngagûcokagîria nkaatho, na ngûkathagîrîrie nîûntû nîgwe Mûrungu waakwa.

²⁹Cokagîrieni MWATHANI nkaatho nîûntû nî ûmwega, na kîaao kîaawe nî gîa kenya na kenya.