Read KIMERU BIBLE PROTESTANT EDITION Zab 119 Bible Online

Zab 119 - KIMERU BIBLE PROTESTANT EDITION bible

Zab 119

¹Kîtharimo nî kîrî barîa beetaga na mîîtîre yaagîrîte barîa bathingataga Waatho bwa MWATHANI.

²Kîtharimo nî kîrî barîa bathingataga mawaatho jaawe barîa bamûthaathagia na nkoro yonthe,

³na barîa batîthithagia mantû jamathûûku barîa bathingataga njîra cia MWATHANI.

⁴MWATHANI ûtûmenyithîtie maathana jaaku nîkenda tûjaathîkagîra na mma.

⁵Ndeenda kwaa mwîtîkua, kîrî kwathîkîra mawaatho jaaku.

⁶Nkëeja kûthingata maathana jaaku bwega rîu ntîcokerwa nî nthao.

⁷Ngagûkumagia na nkoro înjega rîrîa nkaamenya mawaatho jaaku jarîa maagîru.

⁸Nkaathîkagîra Mawaatho jaaku, itû ûkámbîrûkîra.

⁹Nîatîa muntû ûmwîthî oomba kwîthîrwa arî na mîîtîre îmîtheru? Oomba kûthithia ûu akîathîkagîra Waatho bwa MWATHANI.

¹⁰Nkûthaathagia na nkoro yonthe ûkárekeeria ntiga kwathîkîra Maathana jaaku.

¹¹Ndiiritanaga maathana jaaku nkoroone yaakwa nîkenda ntîkeeyie.

¹²Ûrokumagua gwe MWATHANI ndîtanaga njîra ciaaku.

¹³Ngatûmagîîria maathana jonthe jarîa ûnenkerete.

¹⁴Ngwîragîrua kwathîkîra maathana jaaku, o ta ûrîa muntû agwîragîrua kwîthîrwa arî na ûtonga bûbwingî.

¹⁵Nkairitanaga maathana jaaku, na nthingatage ûritani bwaaku.

¹⁶Nî ngwîragua nîûntû bwa Maathana jaaku, ntîûragîrua nî mawaatho jaaku.

¹⁷MWATHANI, nthithagîria mantû jameega ni nthûûmba yaaku, nîkenda ntûûra kwathîkagîra ûritani bwaaku.

¹⁸Mincûria meetho nîkenda mbona mantû ja mma jarîa jarî Wathoone bwaaku.

¹⁹Ni ndî mûgeni nthîgûrûûne îîjî, ûkárega menya maathana jaaku.

²⁰Ndirîragîîria kûmenya maathana jaaku magiita jonthe.

²¹Gwe ûkanûkagia barîa baikumagia. Barîa batîathîkagîra maathana jaaku barî na kîrumi.

²²Mbathûrana na irumi na rûmena rwaao, nîûntû nî nthingataga maathana jaaku.

²³Kinya atongeeria bagankunyanîra ni nthûûmba yaaku nkathûganagia nteto ciîgie ûritani bwaaku.

²⁴Ûritani bwaaku nî bûngwîragia na nî bûmpeejaga kîrîra.

²⁵Ndî beco gûkua, ncokeria inya yaakwa o ta ûrîa rûteto rwaaku ruugîîte.

²⁶Rîrîa ndaumbûrîre mantû jarîa ndaathithîtie, nî wambigîrue. Nandî nditana maathana jaaku.

²⁷Ntethia kûmenya Waatho bwaaku, naani nkairitana mantû ja kûrigaria jarîa ûthithagia.

²⁸Ni nî mpûûmbi nî kîeba, mbîkîra inya o ta ûrîa uugîîte.

²⁹Menyagîîra ntîkeeje gwîta na mîîtîre îmîthûûku, na nîûntû bwa ûtugi bwaaku ûnditane Waatho bwaaku.

³⁰Nî nthuurîte kwaa mwîtîkua, na ndagiita atî nkaathîkagîra mawaatho jaaku.

³¹Nî nthîngataga mooritani jaaku Gwe MWATHANI, ûkáreka ncokerwa nî nthao.

³²Nkaagîa wîru bwa kwathîkagîra Waatho bwaaku, nîûntû nî ûmpongagîîra kîrîra.

³³Nditana ûrîa nkaathingataga maathana jaaku naani nkaajaathîkagîra magiita jonthe.

³⁴Mpa kîrîra naani nkaathîkagîra Waatho bwaaku, na nkabwathîkagîra na nkoro yaakwa yonthe.

³⁵Nteethia mbathîkagîre maathana jaaku, nîûntû nî jatûmaga nkagwîrua.

³⁶Tûma mpeende mawaatho jaaku antû a gûtonga.

³⁷Ûkáreka ndiirîragîria mantû jatî na gîtûmi îndî tûma ntûûre ûrîa wendaga.

³⁸Mbûjûrîria ni nthûûmba yaaku, wîrane bûrîa wîkanagîra na barîa bagûkîraga.

³⁹Mpebanîria na nthao nîûntû nî ncikîrîte, na nîkwîthîrwa Waatho bwaaku nî bûbwega.

⁴⁰Nî mpendeete ûritani bwaaku, mpongeera ûtûûro nîûntû gwe ûrî ûmwagîru.

⁴¹Itû MWATHANI, mpeenda na wendo bûrîa bûtîthiraga, na ûmbonokie kûringana na wîrane bwaaku.

⁴²Rîu nkoona bwa gûcokeria barîa bandumaga, nîûntû nî mbîtîkîtie nteto ciaaku.

⁴³Nteethia mbaragie ûûma akî magiita jonthe nîûntû nî mbîrîgagîîra Waatho bwaaku.

⁴⁴Ngatûûra nkîathîkagîra Waatho bwaaku, kenya na kenya.

⁴⁵Nîkwîthîrwa nî nthingataga ûritani bwaaku, ngatûûraga ndî na ûciathi.

⁴⁶Ngaatûmagîîria maathana jaaku kîrî anene, na ntîîkîrithua nthao.

⁴⁷Ngwîragua nî kwathîkîra maathana jaaku, nîûntû nî njendeete.

⁴⁸Nî mpeendaga maathana jaaku na nkajeekîîra na nkairitanaga mawaatho jaaku.

⁴⁹Ririkana wîrane bwaaku kîrî ni nthûûmba yaaku, nîûntû wîrane bwaaku nî bûtûmîte ndagîa wîrîgîîro.

⁵⁰Kinya rîrîa nthaangîkaga nî mboragîrua nî wîrane bwaaku, atî nîgwe weejanaga mwoyo.

⁵¹Antû barîa batiijî Mûrungu bancikûûraga baikumîtie, îndî ni ntîtigaga kwathîkîra Waatho bwaaku.

⁵²Itû MWATHANI ndirikanaga Waatho bwaaku bûrîa weekîre tene, nkaigua ndaaborera.

⁵³Nî nthûûraga mono rîrîa ndoona antû babaaî bakîrega kwathîkîra Waatho bwaaku.

⁵⁴Gûntû kunthe kûrîa mbîthagîrwa ndî nî mbinaga ndwîmbo ciegiî maathana jaaku.

⁵⁵Nkûririkanaga kinya ûtukû gwe MWATHANI, nkaririkana ûrîa nkoojûria Waatho bwaaku.

⁵⁶Mboneete itharimo biu, nîûntû bwa kwathîkîra maathana jaaku.

⁵⁷Nîgwe nthuurîte itû MWATHANI, na nî nciîtîtie atî nkaathîkagîra nteto ciaaku.

⁵⁸Nî ngûkwerenca buru ûmbigîîrue kîaao o ta ûrîa wîrane bwaaku bûkari.

⁵⁹Nthûgaanagia bwa mîîtîre yaakwa, nkagarûka nkathingata Waatho bwaaku.

⁶⁰Nkaageragia na mpwîî kûûjûria maathana jaaku.

⁶¹Kinya antû babaaî bagantegia na mîtego, ntîûrîrua nî Waatho bwaaku.

⁶²Mbûkagîîra ûtukû gatîgatî ngagûkumia, nîûntû Waatho bwaaku nî bûbwagîru.

⁶³Acoore baakwa nî barîa bonthe bakûthaathagia, barîa bonthe baathîkagîra maathana jaaku.

⁶⁴Itû MWATHANI, nthîgûrû yûjûri wendo bwaaku bûrîa bûtîthiraga, nditanaga maathana jaaku.

⁶⁵Gwe MWATHANI, nî ûnthithagîria mantû jameega ni nthûûmba yaaku, kûringana na wîrane bwaaku.

⁶⁶Mpeejaga ûûme na ûmenyo nîûntû nî mbîtîkîtie maathana jaaku.

⁶⁷Mbere ndaathithagia mantû jamathûûku ûgaankanûkia, îndî nandî nî mbathîkagîra rûteto rwaaku.

⁶⁸Gwe MWATHANI ûrî ûmwega na mantû jarîa ûthithagia nî jameega nditanaga maathana jaaku.

⁶⁹Antû barîa batîîtîkîtie Mûrungu bampandagîîra ûrongo îndî nî mbathîkagîra maathana jaaku na inya yaakwa yonthe.

⁷⁰Nabo batî ûmenyo îndî Waatho bwaaku nî bûtûmaga nkagwîrua.

⁷¹Nî kaaba waankanûkîrie, naani ndamenya kwiritana maathana jaaku.

⁷²Maathana jaaku jarîa waaeejanîre, nî jameega nkûrûki ya thaabu na fetha.

⁷³Gwe MWATHANI nîgwe waampûmbîre, mpa ûûme bwa gûciûra maathana jaaku.

⁷⁴Barîa bagûkîraga bakagwîrua bambona, nîûntû ni nî mbîtîkagia maathana jaaku.

⁷⁵Itû MWATHANI mbijî atî Waatho bwaaku nî bwa mma, wankanûkîrie nîûntû ûrî mwîtîkua.

⁷⁶Mboragîria ni nthûûmba na kîaao gîaaku gîa kenya na kenya, kûringana na wîrane bwaaku.

⁷⁷Mbigagîîrua kîaao nîkenda ntûûra mwoyo nîûntû maathana jaaku nî jatûmaga nkagwîrua.

⁷⁸Barîa batîîtîkîtie Mûrungu barocokerwa nî nthao nîûntû bwa kwaria mantû jaakwa ja ûrongo, îndî ni nkairitana Waatho bwaaku.

⁷⁹Tuma barîa bagûkîraga bacoke kîrî ni, nabo bairitane maathana jaaku.

⁸⁰Tuma mbathîkagîre maathana jaaku bûbwega, ntîkeeje gûcokerwa nî nthao.

⁸¹Nî mbîtîkîtie ûrîa uugîîte îndî ngweteera ûmbonokia nkûnoga.

⁸²Nkûnoga nî gweteera ûûjûria wîrane bwaaku ngîciûragia atîrî, “Nîrî ûganteethia?”

⁸³Kinya këethîra nî mpeete wa ûtheri ntoorîrua nî maathana jaaku.

⁸⁴Ni nthûûmba yaaku ngaakara mbeteereete mwanka rî? Nî mwanka rî ûgaakara ûtîkanûkîtie barîa banthangîkagia?

⁸⁵Barîa batîîtîkîtie Mûrungu nî bampînjagîra marinya, na batîthingataga Waatho bwaaku.

⁸⁶Maathana jaaku jonthe nî ja gwîtîkîka, arongo bambithûkîra, itû ûnteethie.

⁸⁷Barîa batîgwîtîkîtie barî akuî kûnthiria îndî ni ntaatigana na ûritani bwaaku.

⁸⁸Mbonokia nîûntû wendo bwaaku bûtîthiraga naani nkaathîkagîra mantû jarîa uugîîte.

⁸⁹Itû MWATHANI, rûteto rwaaku rûgaatûûra kenya na kenya naru rûgaatûûraga kûu îgûrû magiita jonthe.

⁹⁰Gwe ûtwîre ûrî mwîtîkua nthukîîne cionthe na nîgwe woombîre nthî ûramîrikia ûrîa îtwîre.

⁹¹Into bionthe nîgwe bitumîkagîra nîûntû bwa mawaatho jarîa weekîîre o mwanka naarua tûrî.

⁹²Këethîra maathana jaaku tîjo jatûmaga ngwîrua ndîngî ndathirîrue nî mîthangîko.

⁹³Ntîkoroorîrua nî ûritani bwaaku, nîûntû nîbu bûtûmaga ntûûra.

⁹⁴MWATHANI, mbonokia nîûntû ndî waaku nîkwîthîrwa nî mbathîkagîra ûritani bwaaku.

⁹⁵Antû babaaî bambiciithagîra nîkenda bambûraga, îndî nî maathana jaaku nthûgaanagîria.

⁹⁶Nî nthirîtie kûmenya atî gûtîkîo gîtî mûthia, îndî maathana jaaku jatî mwanka.

⁹⁷Nî mpendeete Waatho bwaaku mono naani mbûthûgaanagîria mûthenya junthe.

⁹⁸Maathana jaaku jampûmîagia magiita jonthe nkûrûki ya ûrîa anthû bampûmîagia.

⁹⁹Ndî ûûme nkûrûki ya aritani baakwa bonthe nîûntû ndiiritanaga na maathana jaaku.

¹⁰⁰Ndî ûûme nkûrûki ya antû babakûrû nîûntû nî nthingataga ûrîtani bwaaku.

¹⁰¹Nî ndiigwataga ntîkaathithie mantû jamathûûku nîkenda mbathîkagîra rûteto rwaaku.

¹⁰²Nîkwîthîrwa nîgwe ûnditanaga maathana jaaku ntîûmba kûregana najo.

¹⁰³Nteto ciaaku irî mûrîo mono nkûrûki ya nainchû.

¹⁰⁴Ûritani bwaaku nî bûtûmaga ngîa ûûme naani nkaregana na mantû jarîa jatîagîrîte.

¹⁰⁵Rûteto rwaaku nîru taawa îrîa îmûrîkagîra njîreene.

¹⁰⁶Ndîte muuma na ndaciîtia atî nkaathîkagîra maathana jaaku jamaagîru.

¹⁰⁷Itû MWATHANI nthîînîte mono nteethia o ta ûrîa uugîîte.

¹⁰⁸Itû MWATHANI, îtîkîîria kîgongwana gîaakwa gîa nkaatho, ûnditanage maathana jaaku.

¹⁰⁹Mbîthagîrwa ndî ûgwatiine magiita jonthe îndî ntîûragîrua nî Waatho bwaaku.

¹¹⁰Antû babaaî nî bambîkagîra mîtego, îndî ntîreganaga na ûritani bwaaku.

¹¹¹Maathana jaaku nî jangwîragia mono nîjo nthuurîte jaa jaakwa kenya na kenya.

¹¹²Nî mbugîîte nkaathîkagîra maathana jaaku mwanka mûthia.

¹¹³Nî nthwîre antû ba nkoro ijîîrî, îndî nî Waatho bwaaku mpendeete.

¹¹⁴Nîgwe rong'o yaakwa na giiciitho gîaakwa, wîrîgîîro bwaakwa nî kîrî rûteto rwaaku bûrî.

¹¹⁵Umeeni kîrî ni buî eeyia, nîkenda mpûûmba kwathîkîra maathana ja Mûrungu waakwa.

¹¹⁶Mbîkîra inya kûringana na wîrane bwaaku nîkenda ntûûra mwoyo, ûkáreka ncokerwa nî nthao nîûntû nî nkwîrîgagîîra.

¹¹⁷Menyagîîra naani ngatûûra kindaajî, ningî mbathîkagîre maathana jaaku magiita jonthe.

¹¹⁸Gwe MWATHANI, barîa bonthe batîathîkagîra Waatho bwaaku, waayia bwaao nî bwa ûtheri.

¹¹⁹Woonaga antû babaaî bakari ta rûko, îndî ûûni nî mpendeete ûritani bwaaku.

¹²⁰Nkaraga na ûguaa ndaririkana ûrîa ûgiitaga îgamba nkainaina ndakûririkana.

¹²¹Nî nthithîtie mantû jarîa jaagîrîte na ja mma ûgántiganîîria kîrî anthû.

¹²²Ûkáreka ni nthûûmba yaaku mpinyîîrua nî anthû no mwanka woone atî nî nkari bwega.

¹²³Nkûnoga nî gweteera ûmbonokia ndaanoga nî gweteera ûûjûria wîrane bwaaku bûrîa bwagîru.

¹²⁴Nthithagîria ni nthûûmba yaaku kûringana na wendo bwaaku bûrîa bûtîthiraga na ûnditanage mawaatho jaaku.

¹²⁵Ni ndî nthûûmba yaaku, mpa ûûme nîkenda menya ûritani bwaaku.

¹²⁶Îgiita nî rîkinyi rîa MWATHANI kûthithia ûntû nîûntû Waatho bwaawe nî buuni.

¹²⁷Mpendeete maathana jaaku nkûrûki ya thaabu, nkûrûki ya thaabu îrîa ntheru buru.

¹²⁸Tontû bûû, nthingataga ûritani bwaaku nkathûûra mantû jamathûûku.

¹²⁹Maathana jaaku nî ja kûrigaria tontû bûu nî njaathîkagîra buru.

¹³⁰Gûciûkîrwa nî rûteto rwaaku nî kûreetaga weerû gûkareta ûûme kîrî barîa batî nabu.

¹³¹Nkaraga mbeteereete mono nyoonterete maathana jaaku.

¹³²Garûka ûmbigîîrue kîaao, o ta ûrîa wigagîîrua barîa bakwendeete.

¹³³Ndigagîîria ntîkagwe o ta ûrîa uugîîte, na ûkáreka mpûûmbwa nî ûthûûku.

¹³⁴Mbonokia kuuma kîrî barîa bampinyagîîria, nîkenda mpûûmba maathana jaaku.

¹³⁵Îthagîrwa ûrî amwe naani ni nthûûmba yaaku, na ûnditanage maathana jaaku.

¹³⁶Ndîraga mono, nîûntû antû batîathîkagîra Waatho bwaaku.

¹³⁷Gwe ûrî ûmwagîru MWATHANI na Waatho baaku nî bwa îota.

¹³⁸Maathana jarîa ûnenkanîrîte nî jamaagîru, na jonthe nî ja gwîtîkîka.

¹³⁹Nthûûraga mono ndoona anthû baarega gûtindanîra na maathana jaaku.

¹⁴⁰Wîrane bwaaku nî bwa mma ni nthûûmba yaaku nî mbwendeete.

¹⁴¹Ntî îgweta na nî meni, îndî ntîûragîrua nî ûritani bwaaku.

¹⁴²Waagîru bwaaku nî bwa kenya na kenya, Maathana jaaku nî ja mma.

¹⁴³Ndî na thîîna na mîthangîko îmiingî, îndî maathana jaaku nî jatûmaga nkagwîrua.

¹⁴⁴Maathana jaaku nî jamaagîru magiita jonthe, mpa ûûme naani ngeeta na mbere gûtûûra.

¹⁴⁵Ndîkûromba itû MWATHANI, wigague îromba rîaakwa naani nkaathîkagîra maathana jaaku

¹⁴⁶Ndakwereenca itû ûmbonokie naani nkaathîkagîra maathana jaaku.

¹⁴⁷Mbûkagîîra mbere ya riûa riuma, ngaagûkaîra nîkenda ûnteethia, wîrîgîîro bwaakwa bûrî kîrî wîrane bwaaku.

¹⁴⁸Ndaaraga ntî toro ûtukû bunthe, nîkenda nthûgaanîria wîrane bwaaku.

¹⁴⁹Nthikîîra itû MWATHANI nîûntû bwa wendo bwaaku bûrîa bûtithiraga. Nteethia ntîgaakue, kûringana na Waatho bwaaku.

¹⁵⁰Barîa bambangagîra mîbango îmîthûûku nî bankirimanîtie nabo batîthingataga Waatho bwaaku.

¹⁵¹Îndî gwe MWATHANI ûrî akuî naani, maathana jaaku jonthe nî ja mma magiita jonthe,

¹⁵²Maathana jaaku nî jaamenyithîrie o tene atî ûjeekîte o nîkenda jatûûra kenya na kenya.

¹⁵³Tega ûrîa nkûthaangîka ûmbonokie, nîûntû ntîûragîrua nî maathana jaaku.

¹⁵⁴Ntetagîîra magambeene na ûmbonokagie, ûûjûragie wîrane bwaaku wîte na mbere kûmbîîka mwoyo.

¹⁵⁵Antû babaaî batîathîkagîra maathana jaaku tontû bûu batîonokua.

¹⁵⁶Itû MWATHANI gwe ûrî kîaao gîkiingî, tûma mbîte na mbere gûtûûra mwoyo nîûntû ûrî wa îota.

¹⁵⁷Anthû baakwa na barîa banthangîkagia nî babaingî, îndî ntîtiga kwathîkagîra maathana jaaku.

¹⁵⁸Mbonaga barîa batîîtîkîtie Mûrungu nkaigua bûbûûî, nîûntû bo batîathîkagîra maathana jaaku.

¹⁵⁹Gwe MWATHANI nî wiijî ûrîa mpendeete maathana jaaku, tontû bûu mbonokia nîûntû bwa wendo bwaaku bûrîa bûtîthiraga.

¹⁶⁰Nteto irîa cionthe waragia nî cia mma, Mawaatho jaaku jonthe nî jamaagîru na nî ja gûtûûra kenya.

¹⁶¹Atongeeria bambithûkagîra gûtî na gîtûmi, îndî ni ngeeta na mbere gwîtîkia nteto ciaaku.

¹⁶²Ngwîragîrua wîrane bwaaku atîa, o ta muntû wigwatîrîte ûtonga ndweene.

¹⁶³Nthwîre ûrongo na nkabûmena, îndî nî mpendeete Waatho bwaaku.

¹⁶⁴Ngûcokagîria nkaatho mainda mûgwanja o ntukû, nîûntû maathana jaaku nî jamaagîru.

¹⁶⁵Barîa bendeete maathana jaaku barî thîîrî înyiingî, gûtîkîo kîûmba kûbagiitaria.

¹⁶⁶Mbathîkagîra maathana jaaku itû MWATHANI, mbeteereete ûmbonokia.

¹⁶⁷Mpendeete ûritani bwaaku mono nî mbwathîkagîra.

¹⁶⁸Gwe nî wiijî mantû jarîa nthithagia gwe nî wiijî atî nî mbathîkagîra maathana jaaku na ûritani bwaaku.

¹⁶⁹Itû MWATHANI igua gûkaya gwaakwa ûnteethie mpa ûûme bwa kûthithia ûrîa uugîîte.

¹⁷⁰Thikîîra îromba rîaakwa, ûmbonokie o ta ûrîa uugîîte.

¹⁷¹Ngaagûkumagia magiita jonthe nîûntû nî ûnditanaga Waatho bwaaku.

¹⁷²Nkainaga ndwîmbo ciegiî rûteto rwaaku nîûntû maathana jaaku jonthe nî ja mma.

¹⁷³Îthagîrwa withuranîrîte gûnteethia, nîûntû nî nthuurîte kûthingata ûritani bwaaku.

¹⁷⁴Nî Mpendeete Waatho bwaaku itû MWATHANI, mbeteereete ûmbonokia.

¹⁷⁵Tûma mbîte na mbere gûtûûra mwoyo, nîkenda ngûkumagia. Tûma mbonage ûteethio kuuma kîrî ûritani bwaaku.

¹⁷⁶Mbûrîte ta ûrîa ng'ondu yûûraga, ncwaa ni nthûûmba yaaku, nîûntû ntîûragîrua nî maathana jaaku.