Read KIMERU BIBLE PROTESTANT EDITION Zab 135 Bible Online

Zab 135 - KIMERU BIBLE PROTESTANT EDITION bible

Zab 135

¹Kumagieni MWATHANI! Kumagieni riîtwa rîa MWATHANI buî nthûûmba cia MWATHANI.

²Mûkumagieni buî bûmûtumîkagîra bûrî kîûrûûne kîa MWATHANI buî bûmûtumîkagîra bûrî biaragoone bia nyomba ya Mûrungu weetû!

³Kumagieni MWATHANI nîûntû nî ûmwega gongageeni riîtwa rîaawe nîûntû nîu kwagîrîte.

⁴Nîkwîthîrwa nî athuurîte nchiarwa cia Jakubu ciaa ciaawe athuura Israeli yaa yaawe.

⁵Nî mbijî MWATHANI nî ûmûnene MWATHANI weetû nî ûmûnene nkûrûki ya mîrungu yonthe.

⁶MWATHANI athithagia ûrîa akwenda îgûrû na nthîgûrûûne na îrieene.

⁷Nîwe ûreetaga matu ja ngai kuuma mîthieene ya nthîgûrû nîwe ûtûmaga ndweni cienia rîrîa gûkuura akareeta ruuo kuuma kûrîa rûtûûraga.

⁸Nîwe wooragîre iranga bia antû na bia nyomoo cia Misri.

⁹Nîku aaringîîre biama arakanûkia Farao amwe na atongeeria.

¹⁰Nîwe wathirîrie mîgongo îmiingî arooraga anene baarî inya.

¹¹Nabo nî mûnene wa Aamori tawe Sihoni, na mûnene wa Bashani tawe Ogi. Ningî arathiria moonene jonthe ja Kanaani.

¹²Aranenkanîra nthîgûrû ciaao iraa ngwato ya antû baawe ba Israeli.

¹³Itû MWATHANI ûtûûraga kenya na kenya. Gwe MWATHANI wijîkeene nthukîîne cionthe.

¹⁴MWATHANI agaakaria antû baawe akaigîîrua nthûûmba ciaawe kîaao.

¹⁵ Mîrungu ya mîgongo îngî îthithîtue nî antû nayo îthithîtue na fetha na thaabu.

¹⁶Mîrungu îîu îrî kanyua îndî îtîaragia îrî meetho îndî îtîonaga.

¹⁷Îrî matû, îndî îtiigagua ningî îtîûmba gûkuucia mîrukî.

¹⁸Barîa bamîthithagia bakari o ta yo ûrîa wonthe ûmîtîkagia nîu akari.

¹⁹Antû ba Israeli, kumagieni MWATHANI nchiarwa cia Aaroni goongageeni MWATHANI!

²⁰Nchiarwa cia Lawi goongageeni MWATHANI, barîa bonthe bamûkîraga nî bamûkumagie.

²¹Kumagieni MWATHANI bûrî Zaiûni bûkumagie MWATHANI ûrîa ûtûûraga Jerusalemu. Kumagieni MWATHANI!