Read KIMERU BIBLE PROTESTANT EDITION Zab 139 Bible Online

Zab 139 - KIMERU BIBLE PROTESTANT EDITION bible

Zab 139

¹(Îîjî nî Zaburi ya Daudi.) Itû MWATHANI, gwe nî ûnthûûjîte wamenya.

²Gwe nî wiijî mantû jonthe jarîa nthithagia ûrî kûraaja nî ûmenyaga ûrîa nkûthûgaania.

³Nî wiijî rîrîa nkûrita ngûgî na rîrîa nogoki, mathithio jaakwa jonthe nî ûkûjamenya.

⁴Kinya mbere ya mbaria gwe MWATHANI nî ûmenyaga bwega ûrîa nkwenda kuuga.

⁵Gwe ûmbirigîrîte nteere cionthe ûnkaragia na inya yaaku.

⁶Ûûme ta bûu nî bûbûnene mono kîrî ni ntîûmba kwîthîrwa ndî nabu.

⁷Nîkû mpûûmba gwîta nkamatûka Roho waaku? Nîkû matûkîkia ngakwebera?

⁸Ndaitia îgûrû nîku ûtwîre! Ndamama gwa akuû, gwe ûrî nao!

⁹Kinya nkabuurûûka ngeeta bwa gaiti, kana ndëeta kûraaja bwa rûgûrû gûtûûra ku,

¹⁰nî ka wîthîrwa ûrî nao kinya ku ûgantongeeria; nî ka wîthîrwa ûrî nao ûgankaria.

¹¹Ndauga muundu nî jûnkunîke kana weerû bûrîa bûncîgîîrîîtie bwee ûtukû;

¹²kinya muundu kîrî gwe tî muundu; ûtukû kîrî gwe bûthaaraga ta mûthenya, kîrî gwe ûtukû na mûthenya no ûmwe.

¹³Nîgwe waampûmbîre ûrampûûmba ndî kîu kîa maama.

¹⁴Nî ngûgûkumia gwe nîûntû ûmpûmbîte mûûmbîre jwa kûrigarania na jwa gûkîrwa mono naani nî mbijî bwega atî, ngûgî irîa ûritaga nî cia kûrigaria.

¹⁵Rîrîa mîîndîîndî yaakwa yaathithagua rîrîa ndoombagwa ndî kîu kîa maama, rîrîa ndaakûraga ndî withoone;

¹⁶gwe nî waambonaga rîrîa ndoombagwa. Ntukû cia ûtûûro bwaakwa nî ciaandîki cionthe yukuune rîaaku kinya mbere ya ciambîrîria gûtarwa.

¹⁷Mathûgaanio jaaku jarî gîtûmi mono kîrî ni Itû Mûrungu nîatîa jarî jamaingî!

¹⁸Nkëenda kûjatara nî jamaingî ta mûthanga. Ndookîîra kuuma toroone mbîthagîrwa ndî amwe naagwe.

¹⁹Itû Mûrungu, ndeenda mono ûûraga barîa baaî! Ndeenda ûmpebaeberia ooragani buru.

²⁰Bo baaragia mantû jaaku jamathûûku, baaragia mantû jamaaî jegiî riîtwa rîaaku.

²¹Itû MWATHANI, nî nthwîre barîa bakûthwîre, na nî meneete barîa baregaga gûkwathîkîra.

²²Mbathwîre bûbûûî mbataraga barî anthû.

²³Nthûûja itû Mûrungu ûmenye mathûgaanio jaakwa, ngeria woone ûrîa nthûgaanagia.

²⁴Woone këethîra kûrî koothûûku ndî nako, ûntongeerie njîreene ya ûtûûro bwa kenya na kenya.