Read KIMERU BIBLE PROTESTANT EDITION Zab 140 Bible Online

Zab 140 - KIMERU BIBLE PROTESTANT EDITION bible

Zab 140

¹(Îîjî nî Zaburi ya Daudi.) Itû MWATHANI, mbonokia kuuma kîrî barîa baaî ûnkarie kuuma kîrî antû barîa beendeete ndwaa.

²Barîa babangaga ûthûûku nkoroone barîa bacwaga mateta îgiita rîonthe.

³ Ndûûme ciaao ikari ta njoka imbîî nteto ciaao ikari ta ûrogi bwa kiua.

⁴Nkaria itû MWATHANI, kuuma njareene cia barîa baaî. Ûnkarie kuuma kîrî antû ba ndwaa barîa bambangagîra ûrîa bakanthiria.

⁵Aikumia nî bankûmîrîte mîkûmo bantegia na rûgara bambîîkîra mîtego njîreene.

⁶Mbîîraga MWATHANI atîrî, “Nîgwe Mûrungu waakwa.” Itû MWATHANI, igua îromba rîaakwa ûnteethie.

⁷MWATHANI waakwa, Mweneinya nîgwe ûntunyûkagia nîgwe ûnkaragia îgiita rîa ndwaa.

⁸Itû MWATHANI ûgéetîkîîria barîa baaî bathithia ûrîa bakwenda ûgéetîkîîria mîbango yaao îmîthûûku îbua.

⁹Ûgéetîkîîria anthû baakwa boombana tûma thîîna îrîa bancwaagîra îbacokere bongwa.

¹⁰Barogwîrwa nî makara ja mwanki barogerwa marinyeene bakaremwa nî kuuma ku.

¹¹Barîa bakûûjagîîra bangî ûkûûjî bwa ûrongo bakoroirikîria nthîgûrûûne, barwejîîrwa nî ûthûûku ntûti bakathirua.

¹²Nî mbijî MWATHANI nî akaragia nkîa mantûûne jaao jonthe na akathithîria barîa barî na ûbatu mantû ja îota.

¹³Nî mma barîa baagîru bagaagûkumagia na bagaatûûraga amwe naagwe.