Read KIMERU BIBLE PROTESTANT EDITION Zab 144 Bible Online

Zab 144 - KIMERU BIBLE PROTESTANT EDITION bible

Zab 144

¹(Zaburi ya Daudi.) MWATHANI arokumua, We ûrîa ûrî iiga rîaakwa rîa gwituma. We ûnthuranagîra nîûntû bwa ndwaa agatûma menya kûrwaa.

²Nîwe iiga rîaakwa rîa gwituma na nîwe giitiiro gîaakwa na mûmbonokia. Nîwe rong'o yaakwa îrîa nciigagîra nayo. Nîwe ûtûmaga mbatha antû ba mîgongo îngî.

³ Itû MWATHANI, muntû nûû nîkenda ûmûthûgaanîria kana mûtaana wa muntû nûû nîkenda ûmenya mantû jaawe?

⁴Muntû akari ta mîrukî matukû jaawe nî ta îtu rîkûrûkîte.

⁵Itû MWATHANI, rugûra îgûrû wîname ringithia irîma nabio bikauma toogi.

⁶Tûma ndweni ciînge anthû ûrathe anthû na mîgwî yaaku nabo bakamatûka.

⁷Taambûrûkia njara yaaku kuuma kûu îgûrû ûntuunyûkie na ûmbonokie kuuma ndûûjîîne imborokeru. Ûnteethie kuuma kîrî antû ba nthîgûrû ingî.

⁸Bau nîbo baaragia ûrongo barîa baaragia ûrongo kinya barîte muuma.

⁹Ngaakwinîra rwîmbo rûrwerû gwe Mûrungu nkaaringa kînanda nkwinîre.

¹⁰Weejaga anene ûûmbani ûgaatunyûkia nthûûmba yaaku Daudi.

¹¹Mbonokia kuuma ndweene înthûûku ûntuunyûkie kuuma kîrî anthû barîa baaragia ûrongo bakaaria ûrongo kinya barîte muuma.

¹²Ataana beetû barokûra ta imera birîa bikûraga bwega rîrîa barî babeethî aarî beetû barokara ta itugî birîa bigwatagîîra gîkaro kîa mûnene.

¹³Nchuku cieetû iroojûra ikaunîkara irî na irio bia mîthemba yonthe. Ng'ondu cieetû irothegea igaciarîra bieniine tûng'ondu ngiri inyiingî.

¹⁴Ng'ombe cieetû irociaraga bwega itîkuunithia kana ikuîrwa nî njaû. Njîreene cia ntûûra cieetû gûkoroigîîgua kîrîro.

¹⁵Kîtharimo nî kîrî antû ta bau boonaga itharimo ta biu. Kîtharimo nî kîrî antû barîa Mûrungu arî MWATHANI waao.