Read KIMERU BIBLE PROTESTANT EDITION Zab 147 Bible Online

Zab 147 - KIMERU BIBLE PROTESTANT EDITION bible

Zab 147

¹Kumagieni MWATHANI! Nî bûbwega kûgonga Mûrungu weetû. Nî ûntû bûbwega na bwagîrîte bwa kûmûkumagia.

²MWATHANI nî agwaka Jerusalemu; nî akûreeta atae kuuma kîthamîrioone.

³Nîwe weejaga antû wîrîgîîro na akaoga barîa barî na iroonda.

⁴Nîwe ûmenyaga ûrîa njota ing'ana akaa o njota riîtwa rîaayo.

⁵MWATHANI weetû arî inya înene ûûme bwaawe bûtîûmba kûmenyeka.

⁶MWATHANI nî ookagîîria barîa bakinyaangîri nthî akagwîthia barîa baaî nthîgûrû.

⁷Inagîreeni MWATHANI ndwîmbo cia nkaatho bwinagîre Mûrungu na inanda bia mîthemba yonthe.

⁸Nîwe ûkunîkaga îgûrû na matu akaurithia ngai nthîgûrûûne; agatûma nyaki yuuma irîmeene

⁹Nî aejaga nyamû biakûrîa amwe na kaana gakûrîra ga gachînchîgîrî.

¹⁰Atîgwîragîrua kwona ûrîa mbarathi irî na inya kana ûrîa njûûrî ing'eenti.

¹¹Îndî agwîragua nî barîa bamûkîraga barîa beerîgagîîra wendo bwaawe bûrîa bûtîthiraga.

¹²Kumagia MWATHANI îgwe Jerusalemu! Ukumagie Mûrungu waaku gwe Zaiûni.

¹³Nîkwîthîrwa nî eekagîra mpingîro cieenu inya akatharima antû barîa batûûraga ndeene yaaku.

¹⁴Nî atûmaga bwîthîrwa bûrî na thîîrî mîankeene, akabûrera na nkano irîa njega.

¹⁵Augaga ûntû bûthithîke nthîgûrûûne bûkathithîka ntûti.

¹⁶Ataambagia nkamia ta bamba agûtaambia akanyagia ngai ya nchûgû ta tîîri.

¹⁷Atûmaga ngai ya nchûgû ta mûthanga gûtî wa kûûmîîria mpio îrîa atûmaga.

¹⁸Augaga na kanyua akî nkamia îgakerûka agatûma ruuo ndûûjî ikaunîkara.

¹⁹Eeraga nchiarwa cia Jakubu rûteto rwaawe akeera Israeli mawaatho na maathana jaawe.

²⁰MWATHANI ataathithîria mîgongo îngî mantû ta jau na îtiijî Waatho bwaawe. Kumagieni MWATHANI.