Read KIMERU BIBLE PROTESTANT EDITION Zab 148 Bible Online

Zab 148 - KIMERU BIBLE PROTESTANT EDITION bible

Zab 148

¹Kumagieni MWATHANI! Mûkumagieni kûu îgûrû akumague nî barîa batwîre nthîgûrû.

²Buî araîka bonthe mûgongageni na akumague nî mainya ja îgûrû.

³Mûkumagie buî riûa na mweri o amwe na njota cionthe!

⁴Gwe îgûrû rîrîa rîrî kûraaja mûkumagie, mûgongageni buî ndûûjî irîa ikaraga îgûrû.

⁵Biu bionthe nî bikumagie riîtwa rîa MWATHANI nîûntû we aarîrie nabio biroombwa.

⁶MWATHANI nîwe waaugîre bikare arîa birî kenya na kenya areeka Waatho bûrîa bûtîûmba kuunwa.

⁷Kumagieni MWATHANI gûkû nthîgûrû naagwe îria, na nyamû irîa itûûraga ndeene yaaku, mûkumagieni.

⁸Ndweni na ngai ya nchûgû nkamia, na matu amwe na ibuubani, nî biathîkagîra MWATHANI.

⁹Irîma na tûbari tunthe mîtî ya matuunda na mîtarakwa yonthe nî bimûkumagie.

¹⁰Nyamû na nyomoo cia nja cionthe nyamû irîa ikuaga na nthî na nyoni nî imûkumagie.

¹¹Mûkumagieni buî anene na antû bonthe buî atongeeria na bonthe barîa baathanaga.

¹²Mûkumagieni buî nthaka na aarî antû babakûrû na twaana.

¹³Bau bonthe nî bagoongage riîtwa rîa MWATHANI, riîtwa rîaawe nî rîkumague rîonka. Ûkumio bwaawe nî bûbûnene nkûrûki ya nthîgûrû na îgûrû.

¹⁴MWATHANI nî eekîîre mûgongo jwa antû bwaawe inya, nîkenda antû baawe bonthe bamûkumagia. Antû baawe ba Israeli barîa endete mono kumagieni MWATHANI.