Read KIMERU BIBLE PROTESTANT EDITION Zab 17 Bible Online

Zab 17 - KIMERU BIBLE PROTESTANT EDITION bible

Zab 17

¹Itû MWATHANI mbigua; thikîîra îkaya rîaakwa ûnteethie! Igua ngîkûromba, ntî na waayia.

²Tega woone arîa ûûma bûrî; ûmpebeerie îgi.

³Kinya ûgacûnkûûna nkoro yaakwa; kinya ûganceema ûtukû; kinya ûkangeria buru, gûtî meeyia wona ndeene yaakwa; ni ntîaragia mantû jatî ja mma.

⁴Ûntû bwegiî mathithio jarîa antû bathithagia, ni nî ndeganîte na mîîtîre ya imaramari nthithagia mantû jarîa uugîîte.

⁵Nî mbîtaga na mîîtîre yaaku; na ntîmîebagîra.

⁶Itû Mûrungu nî ngûgûkaîra, nîûntû nî mbîjî ûkaambîtîka; Itû nkindîra gûtû gwaaku wigue îromba rîaakwa.

⁷Onania kîaao gîaaku kîrîa gîtîthiraga gwe Mwonokia wa barîa bamatûkaaga kîrî gwe rîrîa baithûkîrwa nî anthû baao.

⁸Menyagîîra ta kaana ka riitho ûmbithage ta ûrîa nyoni iithaga twanaana twaayo rungu rwa mathagu jaayo.

⁹Ûnkaragie kuuma kîrî barîa baaî barîa beendaga kûnthiria; anthû baakwa barîa banthiûrûkîrîte.

¹⁰Bo batî kîaao; na mantû jarîa baaragia no ja rwikumio.

¹¹Batwîre beengeene naani; nandî nî banthiûrûkîrîte; beeteereete boona kaanya bangwîthia nthî.

¹²Bakari ta ngatûnyi yeene nyama, nî ta ngatûnyi îng'eentu iiciithîrîte gîntû.

¹³Itû MWATHANI njû, ûbaithûkîre ûbombe ûntunyûkie na rûchiû rwaaku kuuma kîrî barîa baaî.

¹⁴Ntunyûkia na inya yaaku itû MWATHANI, kuuma kîrî barîa beekîte wîrîgîîro bwaao mantûûne ja nthîgûrû. Bakanûkie na îkanûkia rîrîa ûtûûraga wîkîte nîûntû bwaao, Bakanûkie amwe na aana baao, na kinya aana ba aana baao.

¹⁵Îndî ni nî mbijî ngaakwona nîûntû ndî ûmwagîru. Naani rîrîa ngookagîîra rûkîîrî nkaang'anîrwa nî gûkwona ûrîa ûkari.