Read KIMERU BIBLE PROTESTANT EDITION Zab 18 Bible Online

Zab 18 - KIMERU BIBLE PROTESTANT EDITION bible

Zab 18

¹Nî nkwendeete MWATHANI, gwe inya yaakwa.

²MWATHANI nîwe mûkarîa waakwa, na nîwe giitiiro giaakwa kîrîa kîrikie na nîwe ûmbonokagia. Mûrungu waakwa nîwe ûnkaragia na nî kîrî we matûkaga gwiciitha. Nîgue rong'o yaakwa nîgue inya îrîa îmbonokagia; nîgue giiciitho gîaakwa gîkîrikie.

³Nî nkaagîra MWATHANI, naani nkoonokua kuuma kîrî anthû baakwa. MWATHANI arokumua!

⁴Gîkuû nî kîaanthiûrûkîte kunthe, ndîrakoondorua nî inya yaakîo.

⁵Ûgwati bwa gîkuû nî bwanthîûrûkîte, ndîraingîîrwa nî mîtego ya gîkuû.

⁶Nî ndaakaîîre MWATHANI ndî nthîîneene, ndîrarîrîra Mûrungu waakwa kenda anteethia, nawe nî aigîrue îkaya rîaakwa.

⁷Rîu nthîgûrû îrateetema îragitagita; nayo mîsingi ya irîma îrainaina, îragaragara nîûntû bwa mûthûûro jwa Mûrungu.

⁸Togi îrambîrîria kuuma nyiûrû ciaawe, rûmûrî rwa mwanki rûrauma kanyua kaawe; na makara ja mwanki jarambîrîria kuuma kîrî we.

⁹Areebia matu areenama, najo matu jamairû nî jaarî rungu rwa magûrû jaawe.

¹⁰Arakarîra mûkerubi aburûka araburûkîîra ruuoone ta nyoni.

¹¹Araikunîkania na muundu; araciimbîra na matu ja ngai jamakimanu.

¹²Ndweni ciatemanaga mbere yaawe; matu najo jakiuraga ngai ya nchûgû.

¹³MWATHANI nî aagambîre ta ngorogoro kuuma îgûrû Ûrîa Ûrî Îgûrû buru aragondoka, ndweni iratemana na ngai ya nchûgû îraura.

¹⁴Arabagera mîgwî yaawe, arabaaragania; arabatema na ndweni ciaawe, arabathiria.

¹⁵Mîguuru ya îria îroonekana, nayo mîsingi ya nthîgûrû îraumîra, nîûntû bwa îgondoka rîaaku gwe MWATHANI, na inya ya mîrukî îrîa yaumaga nyiûrû ciaaku.

¹⁶Nawe nî aaikîrie njara kuuma îgûrû arangwata, arandita ndûûjîîne imborokeru.

¹⁷Arambonokia kuuma kîrî anthû baakwa barî na inya; na kuuma kîrî barîa baanthwîre, nîkwîthîrwa nî baarî na inya nkûrûki yaakwa.

¹⁸Baambithûkîîre ndî thîîneene; îndî MWATHANI aratuîka ûteethio bwaakwa.

¹⁹Nî aantûnyûkîrie arampa thîîrî, arambonokia nîûntû bwa kûgwîrua nî ni.

²⁰MWATHANI ampeejaga îtuui kûringana na waagîru bwaakwa; andîaga kûringana na mathithio jaakwa jameega.

²¹Nîkwîthîrwa nî nthingataga Waatho bwa MWATHANI magiita jonthe na ntaangaratana ntiga kwathîkîra Mûrungu waakwa.

²²Mawaatho jaawe nîjo jantongagîîria; na ntîûragîrua nî matua jaawe.

²³Ûûnî ntî îgi meethoone jaawe; ningî ntwîre ndegeete meeyia.

²⁴Tontû bûû, MWATHANI ampeejaga îtuui kûringana na waagîru bwaakwa; andîaga nîûntû nî oonaga mathithio jaakwa jameega.

²⁵Barîa bakwathîkagîra, kînya gwe nî ûbaigagua; barîa batî maatia, kinya gwe ûtîbathithagîria bûbûthûûku.

²⁶Kîrî barîa barî nkoro injega, kinya gwe ûtuîkaga ûmwega; Îndî barîa barî nkoro cia waayia kinya gwe nooka ûbagarûkaga.

²⁷Gwe ûteethagia barîa bainyiagia, îndî antû ba rwikumio, gwe nîka ûbathaithagia.

²⁸Gûtî nkaanja gwe nîgwe ûmûrîkagîra; MWATHANI Mûrungu waakwa nîwe ûmpebagîria muundu.

²⁹Ûrî amwe naani no ndwee na njûûrî yonthe na nkamîûmba; nîûntû bwa inya ya Mûrungu waakwa no ntagaare nthingo irîa ibairigîrîte.

³⁰Mantû jarîa Mûrungu athithagia jonthe nî jamaagîru; wîrane bwa MWATHANI nî bwa mma; MWATHANI nîwe rong'o ya barîa bonthe baiciithaga kîrî we.

³¹Tontû rî, ga-kûrî Mûrungu ûngî tiga MWATHANI? Nûû ûngî ûtûkaragia ta rûthingo rwa iiga tiga Mûrungu weetû?

³²Nîwe Mûrungu ûrîa ûmbîkagîra inya, agampeberia ûgwati njîreene.

³³ Atûmaga ngîa na rwîro ta nkûrûngû agatûma ndiirikîria ibariine.

³⁴Nîwe ûnditanîte mantû ja ndwaa mwanka nkoomba gûkûma ûta bwa chuuma na njara ciaakwa.

³⁵Gwe nî ûmpeete rong'o yaaku ya kûmbonokagia na njara yaaku ya ûrîo nîyo îngwatagîîra na ûmenyeeri bwaaku bwambîkîra îgweta.

³⁶Nî ûmpeberetie ûgwati wampa webero, gwe ûtîrekaga ntirûka noo rî.

³⁷Ndeenganîre na anthû baakwa mwanka ndîrabagwatagwata; naani ntaanogoka ntîbathirîtie buru.

³⁸Ndaamûntaga muntû ngatûrîkania, nkamûringa nthî atîûkîîre kaîrî.

³⁹Nîkwîthîrwa gwe nî wampeere inya ya kûrwaa; wanteethia kûûmba maitha jaakwa.

⁴⁰Waatûmîre anthû baakwa baramatûka; ndîrathiria barîa banthwîre buru.

⁴¹Baaikaîre, baraaga wa kûbateethia barakaîra MWATHANI ararega kûbeetîka.

⁴²Ndaabathiîre barainya ta tîîri; ndîrabakinyangîra nthî ta ntaka.

⁴³Nî ûmbonoketie kuumania na ndwaa cia mîgongo îrîa îtîîtîkîtie, wampeethia mûtongeeria wa mîgongo yonthe; antû barîa ntîtwîre mbijî nîbo bantumîkagîra.

⁴⁴Akîrîîndî beejaga kîrî ni bainyiîtie; bambigua akî bakainaina.

⁴⁵Akîrîîndî bakuujaga nkoro buru, bakauma biiciithoone biaao birîa irikie bwega, bagîteetemaga.

⁴⁶MWATHANI arî mwoyo; arokaathwa we mûnteethia; arokumagua we Mûrungu ûrîa ûmbonokagia.

⁴⁷Nîwe Mûrungu ûrîa ûndîagîria, agampûmbanîîra kîrî mîgongo îngî;

⁴⁸nîwe ûmbonoketie kuuma kîrî anthû baakwa. Îî ma, nîgwe ûtûmîte mpûûmba barîa bambithûkagîra; nîgwe ûmbonoketie kuuma njareene cia ooragani.

⁴⁹ Tontû bûû, ngagûkaathîîria kîrî mîgongo MWATHANI, nkwinîre ngîgûkumagia.

⁵⁰Mûrungu nî aejaga mûnene ûrîa athuurîte ûûmbani bûbûnene; nî onanagia kîaao gîtîthiraga kîrî mwîtûûrîrua maguta waawe; tawe Daudi na nchiarwa ciaawe kenya na kenya.