Read KIMERU BIBLE PROTESTANT EDITION Zab 19 Bible Online

Zab 19 - KIMERU BIBLE PROTESTANT EDITION bible

Zab 19

¹Îgûrû nî rîonanagia ûkumio bwa Mûrungu; ningî nî rîtûmagîîria mathithio jaawe ja kûrigaria.

²Mûthenya jûnenkagîîria jûngî nteto cia ûkumio bûu, ûtukû bûgatigîra bûngî ûmenyo bwa ûkumio o bûu.

³Gûtî mûgambo biritaga; gûtî rwaria biaragia; kajû kaabio gatiigîgagua.

⁴ Îndî amwe na bûu, ntûmîîri yaabio îtaambaga nthîgûrû yonthe, îgakinya mîthia yonthe ya nthîgûrû. Kûu îgûrû nîku Mûrungu athithîrîtie riûa gîkaro.

⁵Narîo riumaga ta ûrîa mûjûkania aumagaraga nyomba ntukû ya mûranû, kana ta ûrîa muntû wa rwîro amatûkaga acancamûki.

⁶Riumaga mûthia jûmwe jwa îgûrû rîkagiitania mwanka mûthia jûngî, na gûtî gîntû kîûmba gwiciitha mûû jwaarîo.

⁷Waatho bwa MWATHANI nî bûbwega buru; nî bûriûkagia mwoyo. Maathana ja MWATHANI nî ja mma nî joomîagia barîa batî kîrîra.

⁸Matuîro ja MWATHANI nî jamaagîru; nî jagwîragia nkoro. Maathana ja MWATHANI nî jamaagîru; nî jaeejanaga ûûme.

⁹Gûkîra MWATHANI nî ûntû bûbwega kûrotûûra kenya na kenya. Matua ja MWATHANI nî ja mma; nî ja îota magiita jonthe.

¹⁰Matua ja MWATHANI nî jameega nkûrûki ya thaabu; kinya thaabu îrîa nthongi buru; jarî mûrîo nkûrûki ya nainchû; nkûrûki ya rûrua rwa nainchû.

¹¹Ningî rî, nîjo janditanaga ni nthûûmba yaaku; kûjathingata kûrî îtuui rîrînene.

¹²Îndî rî, nûû wonaga maatia jaawe wengwa? Gwe MWATHANI ndekagîra maatia jarîa nthithagia ntîkûmenya.

¹³Ningî ûmenyagîîre ni nthûûmba yaaku ntîkathithagie meeyia ja ntabarako; ûkaarekeeria jambatha. Naani ngaakaraga ndî ûmûtheru, ntî na untû bwa kûmbîkîra îgi.

¹⁴Gwe MWATHANI mûnteethia na mûkûûri, ûroetîkîra nteto ciaakwa na mathûgaanio jaakwa.