Read KIMERU BIBLE PROTESTANT EDITION Zab 21 Bible Online

Zab 21 - KIMERU BIBLE PROTESTANT EDITION bible

Zab 21

¹Itû MWATHANI, mûnene nî agwîrîîtue nîûntû bwa kûmwîkîra inya; nî akeneete nîûntû bwa kûmwaa ûûmbani.

²Nî ûmûthithîrîtie ûrîa eendaga, na nî wigîtue maromba jaawe.

³Nîkwîthîrwa gwe wamûthagaanîre na itharimo bibingî; ûramwîkîra thirû ya thaabu îrîa ntheru buru.

⁴Aakûrombere mwoyo, naagwe ûramwaa; ûramwaa ûtûûro bûbûraaja.

⁵Ningî nî agîîte nkuma înene kuumania na ûteethio bwaaku; nî ûtûmîte eekîîrwa na aeewa gîtîîo gîkînene.

⁶Îî, gwe nî ûmûtharimîte mwanka kenya; nî ûtûmaga agwîrua nîûntû nî wîthagîrwa ûrî amwe nawe.

⁷Nîkwîthîrwa mûnene eetîkîtie MWATHANI; na nîûntû bwa kîaao kîrîa gîtîthiraga kîa Ûrîa Ûrî Îgûrû buru atîkarwenyeenyeka.

⁸Mûnene akaagwata anthû baawe bonthe; agwate bonthe barîa bamûthwîre.

⁹Abaithûkîra akaabathiria ta ûrîa mwanki jûmûnene jûthiranagia. MWATHANI akaabathiria na mûthûûro; ta ûrîa mwanki jûthiranagia.

¹⁰Mûnene akooraga nchiarwa ciaao ithire buru nthîgûrûûne; mbeeû yaao yûûre buru gatîgatîîne ka antû.

¹¹Kinya bakamûbangîra mantû jamathûûku; na bakamûkunyanîra batîmûûmba.

¹²Nîkwîthîrwa wabeerekeeria mîgwî, bakaagarûka bamatûke.

¹³Ûrokumagua gwe MWATHANI nîûntû bwa inya yaaku! Tûgaakwinîra na tûkaathîrîîrie inya yaaku.