Read KIMERU BIBLE PROTESTANT EDITION Zab 22 Bible Online

Zab 22 - KIMERU BIBLE PROTESTANT EDITION bible

Zab 22

¹ Mûrungu waakwa, Mûrungu waakwa, nîkî ûntû ûmbîrûkîrîte? Nîkî ûntû ûrî kûraaja naani, ûtîgûnteethia kinya ndagûkaîra?

²Itû Mûrungu waakwa, ngûkaagîra mûthenya îndî gwe ûtiigue; nkaraara gûgûkaîra ûtukû îndî ntîone toro.

³Îndî gwe ûrî ûmûtheru; nîgwe ûthûûngûûrîîtwe na ndwîmbo cia ûkumio nî Israeli.

⁴Nîgwe biûjûjû bieetû bietîkîtie. Bagûgwîtîkia, naagwe ûraboonokia.

⁵Baakûrîrîîre naagwe ûrabatunyûkia; bagûgwîtîkia, naagwe ûtaabaringa nthî.

⁶Îndî nandî ni ntî muntû, ndî kang'inyo; mpeete gîntû gîa gûtimbwa nî antû na kûmenwa nî kîrîndî.

⁷ Barîa bonthe bambonaga no kûnthekera banthekagîra; bagankomba bakîmbinainagîria mîtwe bakiugaga,

⁸ “Eerîgîîrîte MWATHANI, nandî nî amwonokie; nî amûtuunyûkie nîûntû nî amwendeete!”

⁹Îndî gwe nîgwe waanditîre kîu kîa maama; nîgwe waamenyeereere ngîonkaga.

¹⁰Ntwîre nkûîrîgîrîîte kuuma ndîgûciarwa; kuuma rîu gwe ûtwîre ûrî Mûrungu waakwa.

¹¹Ûgákara kûraaja naani, nîkwîthîrwa thîîna îrî akuî, na gûtî na wa gûnteethia.

¹²Ncîgîîrîîtue nî anthû babaingî; bakari ta ndeegwa irî inya ndeegwa ta cia nthîgûrû ya Bashani.

¹³Baagamîtie tûnyua twaao nîûntû bwaakwa, ta ngatûnyi îng'eentu îkîruuma.

¹⁴Nthirîri nî kainya buru; kinya maîndîîndî jaakwa nî jarekeenie; nkuîte nkoro buru wîrîgîîro bwathira.

¹⁵Nthirîri nî inya ndoomagara ta rûgîo, rûûme rwaakwa rwarûmata karakara; ûndingîte nthî tîîriine ndatigwa beco gûkua.

¹⁶Nthiûrûkîri nî gîkundi kîa barîa baaî; îî, banthiûrûkîrîte ta kurû bantambûrangîte njara na magûrû.

¹⁷Ndomba gûtara mîîndîîndî jaakwa jonthe. Nabo barînkûnîîra bakambikumîria.

¹⁸ Nguû ciaakwa ka bakûgaana; ka bakwiringîra kuura boona ikaa ciaaû.

¹⁹Îndî gwe MWATHANI, ûgákara kûraaja! Itû nîgwe inya yaakwa, îjaanga ûnteethie!

²⁰Onokia mwoyo jwaakwa jûtîkooragwe, tunyûkia ûtûûro bwaakwa bûtîkooragwe nî kurû iji!

²¹Ndita kanyueene ka ngatûnyi, ûmbonokie kuuma ngoji cia mbogo.

²² Naani nkeera antû beetû mantû jarîa ûnthithîrîtie; ngûkumagie kîûthûranoone kîaao.

²³Kumagieni MWATHANI buî barîa bûmwathîkagîra; buî bwinthe nchiarwa cia Jakubu mûkaathageeni, bûmwejage gîtîîo buî bwinthe antû ba Israeli!

²⁴Nîkwîthîrwa we atîûragîrua nî mîthangîko yaao; kana amena barîa bathangîkaga. We atîbautatagîra, îndî nî abaigagua bamûkaîra.

²⁵Ngaagûkumagia ndî kîûthûranoone kîrîa kînene; nkoojûragia mîciîtio yaakwa mbere ya barîa bakûthaathagia.

²⁶Nkîa ikaarîa inyire; barîa bathaathagia MWATHANI bakaamûkumagia batûûre bathinyaarîte mwanka kenya!

²⁷Mîgongo îkaaririkana îcoke kîrî MWATHANI; antû bonthe ba nthîgûrû bakaamûthaathayia.

²⁸Nîkwîthîrwa waathani bunthe buumaga kîrî MWATHANI, nîwe waathaga mîgongo yonthe.

²⁹Îî itonga bionthe bia nthîgûrû bigaaturia maru bikûthaathayie; barîa bonthe bakuujaga bakaamûthaathayia.

³⁰Nthukî irîa ikeeja nyumeene ikaamûtumîkagîra; o nthukî îrîa îkeeraga nthukî îngî mantû ja MWATHANI.

³¹Ikeeranaga wonokanio bwaawe kinya kîrî barîa batîciari, ciîranage ûrîa oonokeetie antû baawe.