Read KIMERU BIBLE PROTESTANT EDITION Zab 24 Bible Online

Zab 24 - KIMERU BIBLE PROTESTANT EDITION bible

Zab 24

¹ Nthîgûrû nî ya MWATHANI, na bionthe birîa birî ku; nthîgûrû yonthe nî ya MWATHANI na bonthe barîa batûûraga ku.

²Nîkwîthîrwa nîwe waamîînjîîre ndûûjîîne ndeene; areeka mûsingi jwaayo îrieene ndeene.

³Nûû ûûmba gwitia kîrîmeene kîa MWATHANI? Nûû ûûmba gûkûrûka kîûrûûne kîaawe?

⁴ Nî muntû ûrîa ûrî mathithio jameega ûrîa ûrî nkoro întheru; ûrîa ûtîthaathagia mîrungu ya mîng'uanano, ûrîa ûtîciîtagia mîciîtio ya ûrongo.

⁵Ûu nîwe ûkoona kîtharimo kîa MWATHANI; Mûrungu ûrîa ûmwonokagia amûtue ûmwagîru.

⁶Ûu nîu antû barîa bacwaga MWATHANI bakari; barîa bacwaga kwîthîrwa barî amwe na Mûrungu wa Jakubu.

⁷Rugûreeni mpingîro! Bûrugûre mîari ya tene, mûnene wa ûkumio atonye.

⁸Mûnene wa ûkumio nûû? Nî MWATHANI, Mweneinya, mwene ûûmbani; nî MWATHANI, nchamba ya ndwaa.

⁹Rugûreeni mpingîro! Bûrugûre mîari ya tene, mûnene wa ûkumio atonye.

¹⁰Mûnene wa ûkumio nûû? Nî MWATHANI Mweneinya; ûu nîwe mûnene wa ûkumio.