Read KIMERU BIBLE PROTESTANT EDITION Zab 25 Bible Online

Zab 25 - KIMERU BIBLE PROTESTANT EDITION bible

Zab 25

¹Îgwe MWATHANI nî nkûnenkanîra mwoyo jwaakwa kîrî gwe.

²Itû Mûrungu waakwa nîgwe mbîtîkîtie, ûkaareka mbîkîrithua nthao; ûkaareka anthû baakwa boona gîa gwikumîria.

³Îî ûkáreka barîa bagwîtîkîtie beekîrithua nthao; îndî ndemi iu nî icokerwe nî nthao.

⁴Mbonia njîra ciaaku îgwe MWATHANI; nditana kwithingata.

⁵Mbonia ûûma bwaaku, ûnditane kûbûthingata. Nîkwîthîrwa gwe nîgwe Mûrungu mûmbonokia; nîgwe mbîrîgagîîra magiita jonthe.

⁶Ûkóorîrua nî kîaao gîaaku MWATHANI, kana ûûrîrua nî wendo bwaaku bûrîa bwa ntwîre.

⁷Ûkáaririkana meeyia jarîa ndaathithagia ndî muntû ûmwîthî; kana ûririkana maangaratania jaakwa. Itû MWATHANI, ndirikana nîûntû bwa wega bwaaku na bwa kîaao gîaaku kîrîa gîtîthiraga.

⁸MWATHANI nî ûmwega na nî ûmwagîru; nî aritanaga eeyia njîra îrîa ciagîrîte.

⁹Atongagîîria barîa bainyiîtie kûthithia ûrîa kwagîrîte, na akabamenyithia mîîtîre yaawe.

¹⁰Njîra cia MWATHANI cionthe nî cia wendo na ûûma, kîrî barîa bonthe boojûragia kîrîkanîro kîaawe na bakaathîkîra maathana jaawe.

¹¹Ndekera meeyia jaakwa itû MWATHANI nîûntû bwa riîtwa rîaaku, nîkwîthîrwa meeyia nî jamaingî mono.

¹²Nî muntû ûrîkû ûkîrîte MWATHANI? Ûu nîwe MWATHANI oonagia njîra îrîa abuîrîte kûthingata.

¹³Atûûraga athinyaarîte, na nchiarwa ciaawe ikaagwata nthî yee yaao.

¹⁴MWATHANI atumaga ûcoore na barîa bamwathîkagîra, na nîbo oojûragîria kîrîkanîro kîaawe.

¹⁵Nkaraga ntegeete MWATHANI magiita jonthe, nîkwîthîrwa nîwe ûnditaga ûgwatiine.

¹⁶Njû ûmbigîîrue kîaao; nîûntû ga nkûthîîna ndî yooruune.

¹⁷Nyiiîria mathîîna jaakwa; ûndite mîthangîkoone.

¹⁸Tega ûrîa nthangîkîte woone ûrûrû bûrîa ndî nabu, ûndekere meeyia jaakwa jonthe.

¹⁹Tega ûrîa anthû baakwa baingîîte; woone ûrîa banthwîre bûng'ana.

²⁰Menyeera ûtûûro bwaakwa ûmbonokie; ûkaareka mbîkîrithua nthao, nîkwîthîrwa nîgwe kîmatûkîro gîaakwa.

²¹Waagîru bwaakwa na gwîtîkîka gwaakwa bikamenyagîîra, nîkwîthîrwa nîgwe mbîrîgîîrîte.

²²Itû Mûrungu onokia Israeli; na ûmîrite mathîînene jaayo jonthe.