Read KIMERU BIBLE PROTESTANT EDITION Zab 27 Bible Online

Zab 27 - KIMERU BIBLE PROTESTANT EDITION bible

Zab 27

¹MWATHANI nîwe weerû bwaakwa na wonokio bwaakwa, nûû mpûûmba gûkîra? MWATHANI nîwe giiciitho gîaakwa, nûû ûûmba kûmbîkîra ûguaa?

²Rîrîa antû babaaî bambithûkîra bakîenda kûmbûraga, anthû bau baakwa bambithûkîra bagiitaraga bakagwa.

³Kinya njûûrî yonthe îgäncîgîîria ûûni ntîmaka. Kinya anthû bakambithûkîra nkeethîrwa ndî na ûchamba.

⁴Ûntû bûmwe nîbû nkûromba MWATHANI; bûu akî nîbu nkwenda; nabu nî atî ntûûrage nyomba yaawe matukû jonthe ja ûtûûro bwaakwa, mbonage mwago jwaawe, na mûrombage kîrîra ndî kîûrûûne kîaawe.

⁵Nîkwîthîrwa îgiiteene rîa thîîna, nîwe ûkambitha; akaambithaga gîkaroone kîaawe ankunîkagîre na îema rîaawe. Akambîîkaga arîa ntîûmba gûkinyîrîka.

⁶Naani nkoombanaga kîrî anthû baakwa ba nteere cionthe; nkaamûritagîra igongwana îemeene rîaawe ngwîrîîtue mwinagîre ndwîmbo cia kûmûkumia.

⁷Itû MWATHANI igua îkaya rîaakwa, ûmbigîîrue kîaao ûmbîtîke.

⁸Rîrîa wauga, “Nthaathayieni!” Mbugaga na nkoro yaakwa, “Ngaakûthaathayia MWATHANI.”

⁹Ûkámbutatîra MWATHANI; ûgámpînga na mûthûûro ni nthûûmba yaaku, nîûntû nîgwe ûtwîre ûrî mûnteethia. Ûgánta kana ûmbîrûkîra, gwe Mûrungu Mwonokia waakwa.

¹⁰Kinya ndeerûkîrwa nî baaba na maama, MWATHANI akaamenyeera.

¹¹Nditana kûthithia ûrîa kwagîrîte itû MWATHANI; ntongagîîria kûrîa gûtî na ûgwati nîûntû ni ndî na anthû babaingî.

¹²Ûkárekeeria anthû baakwa bathithîria ûrîa bakwenda; nîkwîthîrwa akûûjî ba ûrongo nî bankûûjîrîte ûrongo, bakîendaga kûnthiria.

¹³Nî mbîtîkîtie atî nkoona wega bwa MWATHANI, ndî mwoyo gûkû nthîgûrûûne.

¹⁴Îtîkia MWATHANI; gîa na inya na kûûmîîria gwa nkoro. Îî, gîa na wîrîgîîro ndeene ya MWATHANI!