Read KIMERU BIBLE PROTESTANT EDITION Zab 28 Bible Online

Zab 28 - KIMERU BIBLE PROTESTANT EDITION bible

Zab 28

¹Nîgwe ngûkaîra MWATHANI; gwe ûteethio bwaakwa, ûgankirîra; nîûntû wankirîra rî, gûtî mwanya mbîthîrwa ndî naju na barîa barîîkîtie gûkua na bakathikwa.

²Mbigua rîrîa ngwikaîra, ngîgwîtaga wîja gûnteethia; Rîrîa mbûkîîrîtie njara îgûrû, mberekerete bwa kîûrû gîaaku gîkîtheru.

³Menya ûnjûkanîria amwe na eeyia, barîa baritaga ngûgî imbîî; barîa bacieethagia babeega na mîromo rîrîa bakwaria na antû bangî, îndî nkoroone ciaao kûûjûri waayia.

⁴ Barîee kûringana na ngûgî irîa barîtîte, ûbatuîre kûringana na ûthûûku bwa mathithio jaao. Bakanûkie kûringana na ngûgî ya njara ciaao, ûbae îtuui rîrîa rîbaagîrîte.

⁵Tontû batîtindanagîîra na ngûgî cia MWATHANI kana mathithio jaawe, akabaunanga buru, na atîbacokanîîria kaîrî.

⁶MWATHANI arokumua nîkwîthîrwa we nî ambigagua ndamûkaîra.

⁷MWATHANI nîwe inya yaakwa na rong'o yaakwa; mwîtîkagia na nkoro yaakwa naani ngateetheka; nîkîo gîtûmi ndî na kûgwîrua gûkûnene naani nkaamûkaatha na rwîmbo.

⁸MWATHANI nîwe inya ya antû baawe nîwe giiciitho gîa kwonokia ûrîa athuurîte.

⁹Itû onokia antû baaku na ûtharime kiigai gîaaku; tuîka mûrîîthi waao gwe na ûbamenyeere mwanka kenya.