Read KIMERU BIBLE PROTESTANT EDITION Zab 29 Bible Online

Zab 29 - KIMERU BIBLE PROTESTANT EDITION bible

Zab 29

¹ Îkîîreeni MWATHANI buî biûmbe bia îgûrû, îkîîreeni MWATHANI bûtûmîîrie mwago jaawe na inya yaawe.

²Îkîîreeni MWATHANI bûmûkumie ûrîa kwagîîrîte; thaathayieni MWATHANI kûringana na mwago jwaawe na ûtheru bwaawe.

³Kajû ka MWATHANI kariigîua îgûrû rîa rûûjî; Mûrungu wengwa aakûgondoka, MWATHANI aakûgondoka îgûrû rîa îria.

⁴Kajû ka MWATHANI karî inya, kajû ka MWATHANI nî ka waathani.

⁵Kajû ka MWATHANI kaunangaga mîtarakwa, MWATHANI aunangaga mîtarakwa ya Lebanoni.

⁶MWATHANI atûmaga Lebanoni îtûûatûûa ja kajaû, agatûma Sirioni îthûngathûngûtha ja njaû ya mbogo.

⁷Kajû ka MWATHANI keenagia rweni rûkamûrîka

⁸Kajû ka MWATHANI kainainagia rwanda, MWATHANI ainainagia rwanda rwa Kadeshi.

⁹Kajû ka MWATHANI gatûmaga mîtî îrîa mînene ya miuuru îkambaara, na gakeegera miitû, gûgatigwa gûtî mîtî, naku kîûrûûne kîaawe, birîa bionthe birî ku no gûkûngûîra.

¹⁰MWATHANI nîwe wathaga ngai îrîa nene; MWATHANI atûûraga arî mûnene kenya na kenya.

¹¹MWATHANI aroa antû baawe inya! MWATHANI arotharima antû baawe na thîîrî!