Read KIMERU BIBLE PROTESTANT EDITION Zab 30 Bible Online

Zab 30 - KIMERU BIBLE PROTESTANT EDITION bible

Zab 30

¹Nî ngûgûkumia gwe MWATHANI, nîkwîthîrwa gwe nî ûmbonoketie, na ûtîrekete anthû baakwa bancikûmiria.

²MWATHANI Mûrungu waakwa, ndaagûkaîre nkîenda ûteethio, naagwe ûramboria.

³MWATHANI gwe nî wonoketie mwoyo jwaakwa kuuma gîkuûne, wandita gwa akuû wancokia mwoyo.

⁴Kûngûîreni MWATHANI buî atheru baawe; kumieni riîtwa rîaawe rîîtheru.

⁵Nîkwîthîrwa mûthûûro jwaawe nî jwa kagiita gagakai, îndî wega bwaawe nî bwa kenya na kenya. Muntû araaraga kûrîra, îndî gûgîkîa rûkîîrî akagwîrua.

⁶Naani ndaathinyaara ngaaciîtia mbuge, “Ntîkoroenyenyua.”

⁷MWATHANI gwe, rîrîa wambonia wega, ndiirikagîria ta kîrîma, îndî rîrîa wambitha ûthiû bwaaku, nkoojûrwa nî ûguaa.

⁸MWATHANI nîwe mbîtaga, MWATHANI nîwe nkayagîra.

⁹“Gîkuû gîaakwa kîrî na gîtûmi kîrîkû? Nîmbi ûkoona ndathikwa îrinyeene? Ga-tîîri îgagûkumia? Îgaakûûjîîra ûûma bwaaku?

¹⁰Nthikîîra MWATHANI na ûmbigîîrue kîaao! Itû MWATHANI tuîka mûnteethia!”

¹¹Gwe nî ûthirîtie kwithikîîra gwaakwa, watûma mbina nkîthûngûthaga, ûnditîte mathango wambîkîra nkerû,

¹²Tontû bûû, ngaagûkumia na nkoro yaakwa yonthe ntîgûkira, Gwe MWATHANI Mûrungu waakwa, ngagûcokeria nkaatho mwanka kenya.