Read KIMERU BIBLE PROTESTANT EDITION Zab 31 Bible Online

Zab 31 - KIMERU BIBLE PROTESTANT EDITION bible

Zab 31

¹Nî kîrî gwe mbiciithaga MWATHANI ûkororeka mbîkîrwa nthao; mbonokia gwe nîûntû ûrî umwaagîru.

²Nkindîra gûtû MWATHANI, njû na mpwîî ûnteethie; tuîka kîmatûko gîaakwa, na rûthingo rwa kûmbirigîra.

³Tontû gwe nîgwe giitiiro gîaakwa, na rûthingo rwa kûmbirigîra, mbonia njîra na ûntongeerie nîûntû bwa riîtwa rîaaku.

⁴Giria ntîkagwe mûtegoone jûrîa ntegeri, nîkwîthîrwa gwe nîgwe ûteethio bwaakwa.

⁵ Nîngwîka mwoyo jwaakwa njareene ciaaku; mbonokia gwe MWATHANI, Mûrungu wa ûûma.

⁶Nînthwîre barîa bathaathagia mîrungu îtî gîtûmi ya mîng'uanano, îndî ni nî MWATHANI mbîtîkîtie.

⁷Ndî na kûgwîrua gûkûnene nîûntû bwa kîaao gîaaku; nîûntû nî wonete mîthangîko yaakwa, na nî ûkumenya ûrûrû bwa nkoro yaakwa.

⁸Naagwe ûtînenkanîrîte njareene cia anthû, no gûmpa ûmpeete webero.

⁹Mbigîîrua kîaao MWATHANI nîûntû ndî thîîneene; ndîrîte, meetho jakaimba kinya nkoro na mwîrî nî bibithiru inya.

¹⁰Ûtûûro bwaakwa bunthe nî bwa kîeba, mîaka yonthe no kwithikîîra; nthiri inya buru nî thîîna, maîndîîndî jaakwa nî jamaaraganu.

¹¹Tontû bwa ûrîa anthû baakwa barî babaingî, atûûri baakwa bamenete, batîendaga kûmbona; acoore baakwa ka bainainaga ndagwetwa, nabo barîa ncemanagia nabo njîreene bakamatûka bambona.

¹²Banditîte mathûgaanioone jaao teeka ndî ûmûkuû; kîrî bo ndî wa ûtheri ta nyongû înkuû.

¹³Nî mbigîtue ûrîa nkûguutwa nî babaingî; kûrî na ûgwati nteere cionthe boothûranîte amwe bambîkîra nkireba, nî barîîkanîtie bajûkie mwoyo jwaakwa.

¹⁴Îndî ni nîgwe mbîtîkîtie MWATHANI; mbugîîte, “Nîgwe Mûrungu waakwa.”

¹⁵Ndî njareene ciaaku magiita jonthe; ntunyûkia ûndite njareene cia anthû baakwa na barîa beengene naani.

¹⁶Garûkîra nthûûmba yaaku MWATHANI; mbonokia itû nîûntû bwa wendo bwaaku bûtîthiraga.

¹⁷Ûkaareka mbîkîrithua nthao gwe MWATHANI nîûntû ngûgûkaîra; ka barîa baaî bacokeerwe nî nthao baroînama gwa akuû batîkwaria.

¹⁸Mîromo îrîa yaragia ûrongo îrotumana, îrîa yaaragia nteto cia gûcambia barîa baagîru, îrîa yumaga rwikumio na rûmena.

¹⁹Mawega jaaku nî jamaingî atîa MWATHANI; jarîa wîkîrîte barîa bagûkîrîte; jarîa ûthithagîria barîa bacieejanaga kîrî gwe, meethoone ja antû bangî.

²⁰Ûbaithaga giiciithoone gîa gîkaro gîaaku, arîa antû batîûmba kûbakinyîra; ûbeekaga antû gûtî na ûgwati arîa mîario ya kûbathûûkia îtîûmba kûbakinyîra

²¹MWATHANI arokumua, nîûntû bwa gwîtîkîra kûmbonia kîaao kîaawe kîrîa gîtîthiraga, rîrîa ndaithûkîrîtwe ndîraaga gwa kûmatûkîîra, ta muntû ûrî ndeene ya ntûûra încîgîîrie nî maitha.

²²Tontû bwa ûguaa bûrîa ndaarî nabu, ndaaugaga, arîa ndî ûtîûmba kûmbona. Îndî gwe nî waigîrue maromba jaakwa, rîrîa ndaagûkaîre ûteethia.

²³Endageni MWATHANI bwinthe buî atheru baawe. MWATHANI nî amenyagîîra barîa baamwîtîkîtie, îndî barîa aikumia, akabaa îkanûkia rîa kûng'ana.

²⁴Gîeni na inya na kûûmîîria gwa nkoro, buî bwinthe barîa bakaraga bûrî na wîrîgîîro ndeene ya MWATHANI.