Read KIMERU BIBLE PROTESTANT EDITION Zab 32 Bible Online

Zab 32 - KIMERU BIBLE PROTESTANT EDITION bible

Zab 32

¹ Kaaba muntû ûrekeri maatia jaawe, ûrîa meeyia jaawe jarîkîtie kwangûrwa.

²Kaaba muntû ûrîa ûtî îgi mbere ya MWATHANI, na ûrîa ûtîîkaga mantû ja waayia nkoroone yaawe.

³Rîrîa ntaarî ndînkuumbûra meeyia jaakwa, ndaarî ndînkwinya buru, nîûntû bwa gwikaîîra mûthenya junthe.

⁴Nîkwîthîrwa, gwe wankanûkagia rîonthe, ûtukû na mûthenya; kainya gaakwa kaarî gakûthira buru; ndoomagara mwîrî ta ûrîa matî joomagaragua nî riûa rîa thaano.

⁵Nîrîo ndaugîre, “Nkaaumbûrîra MWATHANI maatia jaakwa.” Naani ndîrairira meeyia jaakwa ntîgûkwitha kinya jarîa jarî nthoni; naagwe ûrandekera ndîrathira îgi.

⁶Tontû bûû, nî mbijî atî muntû ûrîa mwagîru agakûromba îgiita rîa thîîna, kinya îkeethîrwa îmwîjîîrîte ta mûguû jwa îkondoria îtîmûkinyîra.

⁷Gwe nîgwe giiciitho gîaakwa; nîgwe ûgiragia mbona thîîna; ûmpeejaga ûteethio kuuma nteere cionthe.

⁸Ngakweejaga kîrîra na nkwonagîîrie njîra irîa ûbuîrîte gwîtîîra; ngaagûtaaraga na gûtî rîo nkoorîrua nîgwe.

⁹Menya waaga ûûme ta mbarathi kana nyûmbû, irîa ciathagwa na rûthanju na mîrigi, kenda imenya ûrîa muntû akwenda.

¹⁰Mîthangîko ya muntû ûrîa mûûî nî îmiingî; îndî ûrîa wîtîkîtie MWATHANI oonaga mawega jaawe kuuma nteere cionthe magiita jonthe.

¹¹Gwîrueni na bûkeneere MWATHANI, buî barîa baagîru; kûngûîreni na kûgwîrua, buî bwinthe barîa bwathîkagîra MWATHANI.