Read KIMERU BIBLE PROTESTANT EDITION Zab 33 Bible Online

Zab 33 - KIMERU BIBLE PROTESTANT EDITION bible

Zab 33

¹Gwîrîrueni MWATHANI, buî barîa baagîru; barîa baagîru nî babuîrîte kûmûkumia.

²Kumieni MWATHANI na wandîîndî, mwinîreni na kînanda kîa ndigi îkûmi.

³Mwinîreni rwîmbo rûrwerû; ringeni kînanda bwega bûkîmûkûngûagîra.

⁴Nîkwîthîrwa wîrane bwa MWATHANI nî bwa mma, ningî we nî wa gwîtîkua mantûûne jonthe jarîa athithagia.

⁵Eendeete waagîru na îota; nthîgûrû yonthe yûjûri kîaao kîa MWATHANI kîrîa gîtîthiraga.

⁶Îgûrû rîoombîrwe na kiugo kîa MWATHANI; na birîa bionthe birî ku biagîîre kuumania na kanyua kaawe.

⁷Oothûranîrie rûûjî rwa îria ja ûrîa rûûjî rwîkagîrwa gîkirine, aracokanîîria kûrîa kworokeru ja ûrîa into bicokanagîîrua bigeekwa chukuune.

⁸Nthîgûrû yonthe îrokîra MWATHANI; atûûri bonthe ba nthîgûrû nî bamûgwatagîre nthoni.

⁹Nîkwîthîrwa arerie, nthîgûrû îroombwa; aarauga, into bionthe biraumîra.

¹⁰MWATHANI atûmaga nkireba cia kîrîndî ituîka cia ûtheri; agatûma mîbango ya antû îrega kûjûra.

¹¹Kîrîra kîa MWATHANI gîtûûraga mwanka kenya, meerekeeria jaawe jatîgarûkaga.

¹²Kaaba mûgongo jûrîa jûthingataga MWATHANI arî we Mûrungu waaju; nîkwîthîrwa antû baaju nîbo athuurîte barî antû baawe.

¹³MWATHANI araithagîîria kuuma îgûrû, nawe nî onaga antû bonthe ba nthîgûrû.

¹⁴Araithagîîria arî gîtîîne kîaawe kîa ûnene, nawe nî oonaga ûrîa antû bonthe barîa barî nthîgûrû bakûthithia.

¹⁵Nîwe ûbeekagîra mathûgaanio nkoroone ciaao, na nî athûûjaga mathithio jaao jonthe.

¹⁶Mûnene atîonokaga ndweene nîûntû bwa ûrîa arî na njûûrî înene; nchamba itiiritaga ndweene na inya yaayo.

¹⁷Nî gûta îgiita muntû kwîrîgîîra mbarathi îmûûmbanîîra ndweene, amwe na inya yaayo yonthe, îtîûmba kwonokia muntû.

¹⁸Atîrî, meetho ja MWATHANI jatîebagîra barîa bamûkîrîte; akaraga araithîîrîtie barîa beekaga wîrîgîîro bwaao ndeene ya kîaao kîaawe kîrîa gîtîthiraga.

¹⁹Nî aboonokagia gîkuûne, na akagiria bakua îgiita rîa mpara.

²⁰Tûrî na wîrîgîîro ndeene ya MWATHANI nîwe ûteethio bweetû na rong'o yeetû.

²¹Nkoro cieetû irî na kûgwîrua ndeene yaawe, nîkwîthîrwa tûrî na wîtîkio ndeene ya riîtwa rîaawe rîrîtheru.

²²Kîaao gîaaku kîrîa gîtîthiraga kîrokara kîrî tuî MWATHANI, o ta ûrîa kinya tuî tûrî na wîrîgîîro ndeene yaaku.