Read KIMERU BIBLE PROTESTANT EDITION Zab 34 Bible Online

Zab 34 - KIMERU BIBLE PROTESTANT EDITION bible

Zab 34

¹ Ngaakaathaga MWATHANI magiita jonthe; ntîkorotiga kûmûkumagia.

²Nkoro yaakwa iikumagia nîûntû bwa MWATHANI buî barîa bûinyîîrîîtue igueni na bûgwîrue.

³Tûkumieni MWATHANI; tûkumie riîtwa rîaawe tûrî amwe.

⁴Ndaarombere MWATHANI, nawe ambigua, arambonokia kuuma kîrî ûguaa bwaakwa bunthe.

⁵Barîa beerîgagîîra MWATHANI, bakaraga bakengakengi, moothiû jaao jatîtukaga nî nthao.

⁶Ni nkîa ndaakaîîre MWATHANI ndî mîthangîkoone, nawe araambigua, na arambonokia thîîneene ciaakwa cionthe.

⁷Mûraîka wa MWATHANI akaragia barîa bakîraga MWATHANI, akaboonokia ûgwatiine.

⁸ Cema MWATHANI woone nî ûmwega; kîtharimo nî kîrî muntû ûrîa wiciithaga kîrî MWATHANI.

⁹Kîrageni MWATHANI, buî atheru baawe, nîkwîthîrwa barîa bamûkîrîte gûtîkîo baagaga.

¹⁰Ngatûnyi no ciage biakûrîa na ikaigua mpara, îndî barîa beetîkîtie MWATHANI gûtîkîo gîkîega baagaga.

¹¹Njûûni, buî aana baakwa, bûnthikîîre, naani nkaabûritana gûkîra MWATHANI.

¹² Kûrî we weenu wendeete kûgwîrîrua ûtûûro? Kûrî we wendeete ûtûûro bûbûraaja bwa kûgwîrua?

¹³Gwata rûûme rwaaku rûtîkaarie bûbûûî, ûrigîrie mîromo yaaku kwaria ûrongo.

¹⁴Tigana na ûthûûku, ûthithagie mantû jameega, cwaaga thîîrî ûtîkûnoga.

¹⁵MWATHANI nî amenyagîîra barîa baagîru; nî aigagua barîa bamûkaagîra.

¹⁶Îndî MWATHANI atîendaga kwona barîa bathithagia mantû jamaaî; bathiria gûkua booragîria buru.

¹⁷Rîrîa barîa baagîru baakaîra MWATHANI, we nî abaigagua, na akabarita thîîneene yonthe.

¹⁸MWATHANI eethagîrwa arî akuî na barîa bakuîte nkoro, ateethagia barîa baagîîte wîrîgîîro.

¹⁹Muntû ûmwagîru nî onaga mathîîna jamaingî îndî MWATHANI nî amûritaga kîrî jo jonthe.

²⁰ Amûmenyagîîra bûbwega buru, atîkaunîke kîrûitû noo kîmwe.

²¹Ûthûûku bwa barîa baaî noobu bûkaabarîa; anthû ba barîa baagîru no mwanka bakanûkue.

²²MWATHANI nî oonokagia antû baawe barîa bamatûkaga kîrî we batîkanûkua.