Read KIMERU BIBLE PROTESTANT EDITION Zab 35 Bible Online

Zab 35 - KIMERU BIBLE PROTESTANT EDITION bible

Zab 35

¹Itû MWATHANI rwaa na barîa banthangaga, ûûre barîa barûjaga naani.

²Rûma mathaga wîje ûnteethie.

³Ûkîîria îtumo winainie mûthîrî, wîngane na anthû baakwa, ûmbîîre ûkaambonokia!

⁴Tûma bacokerwe nî nthao barîa beendaga kûmbûraga baconoke angaaratania barîa bambangagîra ûthûûku batigane nabu.

⁵Barourutwa ta mauuti jauruti nî ruuo, mûraîka wa MWATHANI eenganîte nabo!

⁶Njîra îrîa bageeta nayo îrogîa muundu na îgatendera, mûraîka wa MWATHANI eenganîte nabo!

⁷Nîkwîthîrwa bantegeetie na mîtego ûtheri; bagampînjîra marinya gûtî na gîtumi.

⁸Barothirua batîkûmenya! Barotegua nî mîtego îrîa barantegereete! Barogwa marinyeene jarîa barampînjîrîte bakathira!

⁹Naani nkaagwîrîrua MWATHANI; mûkumie nîûntû bwa kûmbonokia.

¹⁰Nkauga na inya yaakwa yonthe atîrî, “Nûû ûngî ûkari taagwe MWATHANI? Gwe ûkaragia barîa batî na inya kuuma kîrî barîa barî na inya gwe ûteethagia barîa batî kîene kuuma kîrî barîa bainyanagîîria.”

¹¹Antû babathûûku bankûûjagîîra mantû jatîo bakanthitangîra mantû ntiijî.

¹²Bandîaga wega bwaakwa na ûthûûku; bakambîkîra kîeba nkoroone.

¹³Îndî ni nî ndeekagîra ithango rîrîa baajîtue, na ngaciata biakûrîa, ngaturia maru nkeenamîîria mwanka nthî nkabarombera.

¹⁴Ndaathithagia ûu ta muntû ûkuîri nî mûcoore kana mûtaana wa ng'ina; ndeetaga kîrîraga ta muntû ûkuîri nî ng'ina.

¹⁵Îndî boona ndî thîînene, ka boothûranaga bagwîrîtue, bakanthithîria nkireba; nabo ageni ntîtwîre mbijî baakaraga bakîmbûûraga.

¹⁶Barîa baaî bankurungaga na rûmena, bagankûnûrîra meetho bang'eenti.

¹⁷Itû MWATHANI, ûgakara ûmpeete meetho mwanka rî? Mbonokia kuuma kîrî ngatûnyi îîjî!

¹⁸Naani ngagûcokeria nkaatho ndî kîûthûranoone gîa antû baaku; ngaagûkumia ndî ntunduune ya antû baaku.

¹⁹ Ûkaareka barîa bacwaga ûthû naani boona gîa kûgwîrîrua; ûkaareka barîa banthwîre ûtheri boona gîa gwikumîria.

²⁰Nîkwîthîrwa bo batîcwaga thîîrî, îndî bo ka baandagîîra antû ba thîîrî mantû ja ûrongo.

²¹Banthekagîra bakiugaga, “Nîtûroonere ûrîa ûrathithagia.”

²²Îndî nîûntû nî ûroonere ûrîa kûrakarîre MWATHANI ûgákira. Itû MWATHANI ûgaakara kûraaja naani.

²³Ithuranîre gwe Mûrungu MWATHANI waakwa wîje wonanie ûûni ndî ûûmeene.

²⁴Itû MWATHANI Mûrungu waakwa, gwe ûrî ûmwagîru, onania atî ni ntî na maatia, ûtîkaareke bagwîrua bambikumîria.

²⁵Ûkaareka baciîra boongwa atîrî, “Tûkûûjûria ûrîa tûreendaga.” Ûkaareka bauga, “Tûkûmûthiria buru.”

²⁶Tûma bacokerwe nî nthao bangaratane bonthe barîa bagwîragua ndî thîînene! Baroojûrwa nî nthao barîa bambikumagîria!

²⁷Barîa beendaga kwona ntî na îgi nî bakene na bagwîrue bakiugaga MWATHANI nî ûmûnene, we wendaga kwona nthûûmba yaawe îkari bwega.

²⁸Naani nkeerana ûrîa ûrî ûmwagîru, ngûkumie mûthenya junthe.