Read KIMERU BIBLE PROTESTANT EDITION Zab 37 Bible Online

Zab 37 - KIMERU BIBLE PROTESTANT EDITION bible

Zab 37

¹Ûkámakua nî mantû ja barîa baaî; ûkáirîrîîria gûkara ta antû babathûûku.

²Nîkwîthîrwa bakooma ntûti ta nyaki, bakanyaara ta matî jaîîte nî riûa.

³Îtîkagia MWATHANI na ûthithagie mantû jameega naagwe ûgatûûra nthûgûrûûne gûtî ûgwati ûkwona.

⁴Cwaaga kûgwîria MWATHANI, nawe agakûûjûragîria ûrîa ûkwenda.

⁵Cieejanage kîrî MWATHANI; ûmwîtîkagie nawe agaagûteethagia.

⁶Agaatûma waagîru bwaaku bwonekanage ta mûthenya oonanie ûrîa ûrî na îota weerûûne.

⁷Kirîîria kîrî MWATHANI; ûmweteere ûborereete; ûkámaka woona barîa baaî bakîthinyaara.

⁸Ikaanagie mûthûûro na ûreganage na marûrû; ûkainogia nîûntû bireetaga ûthûûku.

⁹Barîa baaî bakathirua; îndî barîa beerîgagîîra MWATHANI bakaagwata nthî yee yaao.

¹⁰Barîa baaî bakaathirua ntûtî bwacwaa kûrîa barî bûtîboona.

¹¹ Îndî barîa bainyiiagia bakaagwata nthî yee yaao bakarage na thîîrî bathinyaarîte.

¹²Barîa baaî babangagîra barîa baagîru ûthûûku bakabakûûrîra meetho na mûthûûro.

¹³Îndî MWATHANI nîka athekagîra barîa baaî, nîûntû nî aijî îgiita rîaao rîa gûkanûkua rîrî akuî.

¹⁴Barîa baaî bakûûrîte nchiû na bakûma moota bûkîendaga kûthiria nkîa irîa itî kîene; barîenda kûthiria barîa baagîru buru.

¹⁵Bakooragwa na nchiû ciaao, na moota jaao jaunangwe.

¹⁶Nî kaaba gantû kanini ka muntû ûmwagîru, nkûrûki ya ûtonga bunthe bwa barîa baaî.

¹⁷Nîkwîthîrwa barîa baaî bagaatunywa inya yaao, nawe MWATHANI akaaigîka barîa baagîrîte.

¹⁸MWATHANI nî amenyagîîra barîa bamwathîkagîra, na nthîgûrû îkaa yaao kenya na kenya.

¹⁹Batîkoroaga ûteethio îgiita rîa thîîna; na îgiiteene rîa mpara, bakethagîrwa barî na bia kûng'ana.

²⁰Îndî barîa baaî bakaathira buru; anthû ba MWATHANI, bakari ta maûa jarîa janyaaraga jakooma bakarima ta toogi.

²¹Muntû ûrîa mûûî, akoobaga atîkûrîaa îndî ûrîa mwagîru, atî ngoga kweejana.

²²Barîa batharimi nî MWATHANI nîbo bakaajûkia nthî yee yaao, îndî barîa barumi nîwe bakeengwa baume ku.

²³MWATHANI nîwe ûteethagia muntû kûgîa na mîîtîre îmîega, ningî nî akaragia muntû ûrîa ûmûgwîragia.

²⁴Kinya akagiitara, atîgûûjaga, nîkwîthîrwa MWATHANI nî amûgwatagîîra.

²⁵Kuuma wîthî bwaakwa mwanka ûkûrû bûu ndî nabu, ntoona muntû ûmwagîru atiganîrîîtue nî MWATHANI, kana mbona aana baawe bakîrombaga biakûrîa.

²⁶We rîonthe aeejanaga na magi, na agakoobithania, nabo aana baawe baeejaga kîtharimo.

²⁷Tigana na ûthûûku wambîîrie kûthithagia mantû jameega, nacio nchiarwa ciaaku igaatûûra nthîgûrûûne mwanka kenya.

²⁸Nîkwîthîrwa MWATHANI nî eendeete ûûma, na atîtiganagîîria barîa bamwîtîkîtie. Barîa baagîru bagaatûûra bamenyeeri mwanka kenya, îndî nchiarwa cia barîa baaî ikeengwa ciume ku.

²⁹Barîa baagîru nîbo bakaajûkia nthîgûrû yee yaao batûûre ku kenya na kenya.

³⁰Muntû ûmwagîru aaragia nteto cia ûûme akaaria mantû jarî na ûûma.

³¹Eekaga Waatho bwa Mûrungu waawe nkoroone na atîbwîrûkagîra.

³²Muntû ûmûûî akabagîra muntû ûmwagîru agîcwaa ûrîa akamûûraga.

³³Îndî MWATHANI atîrekagîîria ûrîa mwagîru kîrî ûrîa mûûî, kana areka atuîrwa bûbûûî îgambeene.

³⁴Îrîgagîîra MWATHANI ûkîmwathîkagîra, nawe agaatûma wigwatîra nthîgûrû yaa yaaku; naagwe ûgaacionera barîa baaî bakîîngwa ku.

³⁵Ndîroona muntû ûmûûî waainyanagîîria waaciûkagîîria îgûrû rîa bangî ta mîtarakwa ya Lebanoni.

³⁶Îndî ngîkûrûkîîra o kaîrî, muntû ûu atî o; ndîramûcwaa ndîramwaga.

³⁷Tega woone muntû mwagîru ûtî îgi; muntû wa thîîrî nîwe ûrî mbeeû.

³⁸Îndî eeyia bakaathiragua; nchiarwa ciaao ithire buru.

³⁹Wonokio bwa barîa baagîru buumaga kîrî MWATHANI; nîwe kîmatûkîro kîaao îgiita rîa thîîna.

⁴⁰MWATHANI nîwe ûbateethagia na akaboonokia; abatuunyûkagia kuuma kîrî barîa baaî, nîûntû beetaga gwiciitha kîrî we.