Read KIMERU BIBLE PROTESTANT EDITION Zab 38 Bible Online

Zab 38 - KIMERU BIBLE PROTESTANT EDITION bible

Zab 38

¹Itû MWATHANI ûkángondokera na mûthûûro jwaaku ûgánkanûkia na marûrû jaaku.

²Nîkwîthîrwa ûndathîte na mîgwî, ndagwa nthî.

³Mûthûûro jwaaku, jûtûmîte nkaajua mwîrî junthe; meeyia jaakwa, jagatûma mbajua.

⁴Meeyia jaakwa jaingîîte jagantagaara; janditwîrîte jankîria inya.

⁵Ndî na ironda bibithûûku nîka bikûnuunka nîûntû bwa waa bwaakwa.

⁶Ndîkuunîka mûgongo buru nî gûtindaga nturîîtie maru ntiirithîtie ûthiû nthî ndithikîîrîte mûthenya junthe.

⁷Ka-ngwakana mwîrî junthe; gûtî o ntîkwigua mûrimo.

⁸Mpûûmbi buru, ntî noo kainya; ndiikaîrîte nî mûrimo nkathîîna nkoroone mono.

⁹Itû MWATHANI nî wiijî mairîrîîria jaakwa; nî ûkwona ûrîa ngwikaîra.

¹⁰Nkoro yaakwa ka îgûtuumatuuma; nthirîri nî inya buru; kinya meetho jaakwa jatîkwona.

¹¹Acoore baakwa na antû barîa bambijî batîkinyaga akuî naani nîûntû bwa mbajua yaakwa; kinya ndûgû ciaakwa irûngamaga gataaria.

¹²Barîa beendaga kûndita mwoyo bantegagîra mîtego; barîa beendaga kûnthûûkia batindaga kûmbangîra ûthûûku mûthenya junthe.

¹³Îndî ni nkari ta muntû ûtî matû, gûtî u mbigagua; nkari ta maamu, ntîtumûraga kanyua gaakwa.

¹⁴Îî nkarî ta gûtî u mbigagua; ta ntîûmba gwiteteera.

¹⁵Îndî ni mbîkîte wîrîgîîro bwaakwa kîrî gwe itû MWATHANI; nîgwe ûgancokeria îromba rîaakwa, itû gwe MWATHANI Mûrungu waakwa.

¹⁶Akî ûrîa ngûkûromba nî atî, ûkarekeeria anthû baakwa bagwîrîrua kûthangîka gwaakwa baikumia boona nkîthira.

¹⁷Nîkwîthîrwa ndî akuî kûthira, na ndî na ûrûrû bûtîkûthira.

¹⁸Nî nkuumbûra maatia jaakwa; nî nkwirira nîûntû bwa meeyia jaakwa.

¹⁹Anthû baakwa barî inya; nî babaingî barîa banthwîre gûtî na gîtûmi.

²⁰Barîa bandîaga wega bwaakwa na ûthûûku banthwîre nîûntû nthingataga ûûma.

²¹Ûkámbîrûkîra itû MWATHANI! Itû Mûrungu waakwa, ûgákara kûraaja naani!

²²Îjanga ûnteethie, itû MWATHANI Mwonokia waakwa!