Read KIMERU BIBLE PROTESTANT EDITION Zab 40 Bible Online

Zab 40 - KIMERU BIBLE PROTESTANT EDITION bible

Zab 40

¹Ndeetereere MWATHANI nkirîrîîtie; nawe arankindîra gûtû, araigua kîrîro gîaakwa.

²Nî aanditîre îrinyeene rîa thîîna, arandita ntakeene ya rûko, arankinyithia antû aariku, ndîratua gwîtaga ntî na ûguaa.

³Nî eekîîre rwîmbo rûrwerû kanyua gaakwa; rwîmbo rwa gûkumagia Mûrungu weetû naru. Babaingî boona mantû jau bagaakîra, nabo bageetîkia MWATHANI.

⁴Kaaba muntû ûrîa wîtîkîtie MWATHANI; ûrîa ûtîîkaga wîrîgîîro kîrî aikumia; kîrî barîa bathingataga mîrungu îtî ya mma!

⁵Mantû ja kûrigarania jarîa ûtûthithîrîtie, nî jamaingî mono mîbango îrîa ûtûbangîrîte nî îmînene gwe MWATHANI Mûrungu weetû, na gûtî Mûrungu ûngî taagwe. Kinya nkauga ntûmîîrie mbîîrane mantû jau, ntîûmba nîûntû nî jamaingî ûntû jatîûmba gûtarîka.

⁶ Gwe ûtî na bata na kûritîrwa igongwana na biewa; ûtîcwaga igongwana bia gwakîîria kana bia kûthiria meeyia; îndî gwe nî wigagua maromba jaakwa.

⁷Naani mbugîîte, “Tega, ndîkwîja! Nîkwaandîki yukuune rîaaku ûrîa mbwîrîte kûthithia;

⁸Nî ngwîragîrua kûthithia wendi bwaaku gwe Mûrungu waakwa; Waatho bwaaku nî bwaandîki nkoroone yaakwa.”

⁹Nî ntûmîîrîtie nteto injega cia kwonokania gwaaku kîûthûranoone kîrîa kînene; gwe MWATHANI nî wiijî gûtî rîo ndaatumia mûromo ndega kwaria.

¹⁰Ntithaga nkuma ya kwonokania gwaaku nkoroone yaakwa; ntûmagîîria ûrîa ûrî wa mma na ûrîa wonokanagia. Gûtî rîo ndegaga gûtûmîîria bwa kîaao gîaaku kîrîa gîtîthiraga na bwa ûûme bwaaku kîûthûranone kîrîa kînene.

¹¹Itû MWATHANI menya ûmbitha kîaao gîaaku, kîaao gîaaku kîrîa gîtîthiraga na ûûma bwaaku bironkaragia magiita jonthe.

¹²Nîkwîthîrwa moothûûku jarîa janthiûrûkîrîte jatîûmba gûtarîka; meeyia jaakwa jaingîîte jaakûrûka kîthimi; nîjo maingî nkûrûki ya nchiûri ciaakwa cia mûtwe; naani nkuîte nkoro buru.

¹³Îtîkîra kûmbonokia itû MWATHANI; itû MWATHANI îjanga na mpwîî ûnteethie!

¹⁴Baroaraganua buru bagacokeerwa nî nthoni barîa bakwenda gûntuunya mwoyo; barocoka baûûri bakiigagua nthoni barîa beendaga kwona ndî thîînene!

¹⁵Barorigara bakarigarûka bacokeeri nî nthao barîa banthekagîîra nî kûmena!

¹⁶Îndî barîa bonthe bakûthaathagia barogwîragua magiita jonthe nîûntû bwaaku; barîa beetîkîtie kwonokania gwaaku baûgaga magiita jonthe, “MWATHANI nî ûmûnene!”

¹⁷Ni ndî nkîa îtî kîene; îndî MWATHANI atîûrîrîtue nî ni. Nîgwe ûteethio bwaakwa na nîgwe mûmbonokia; menya ûthaa itû Mûrungu waakwa!