Read KIMERU BIBLE PROTESTANT EDITION Zab 42 Bible Online

Zab 42 - KIMERU BIBLE PROTESTANT EDITION bible

Zab 42

¹O ta ûrîa nthia iirîragîria rûûjî rwa mpio, noou kinya ni ngûkwirirîria gwe Mûrungu.

²Nkoro yaakwa nî înyonterete Mûrungu; nî înyonterete Mûrungu ûrîa ûtûûraga mwoyo. Ndîûria nîrî ngaakinya nthaathayia Mûrungu ndî mbere yaawe?

³Ntindaga kûrîra, nkaraara kûrîra; meethori nîjo irio biaakwa bia mûthenya na ûtukû; antû nabo bakaraga bakîmbûûragia, “Ka-Mûrungu waaku arî kû?”

⁴Ndirikanaga mantû jaja nkaringwa nî nkoro; ûrîa ndaatongagîîria kîrîndî îgiita rîa mambura, gîgatonya nyomba ya Mûrungu kîthingateene, gîgîkûngûagîra kîgwîrîtue na gîkiinaga ndwîmbo cia gûkaatha Mûrungu.

⁵Nîmbi îtûmîte ûûjûrwa nî kwithikîîra gwe nkoro yaakwa? Nîmbi îtûmîte waga thîîrî? Îtîkia Mûrungu na wîtîkie atî nkaamûkumia o kaîrî; nîwe ûteethio bwaakwa bwa akuî, na nîwe Mûrungu waakwa.

⁶Mûrungu waakwa, ndî na kwithikîîra gûkûnene nkoroone yaakwa; tontû bûu nî ngûkûririkana kinya ndî gûkû nthîgûrû ya Jorodani na ya Herimoni, na ndî kîrîmeene kîa Mizari.

⁷Ndurumo irîgondoka igakara teeka ikwaranîria mîgombe yaaku yonthe îrîîja îgînkunîkanagia.

⁸Mûthenya jûrîa MWATHANI akambonagia kîaao kîaawe kîrîa gîtîthiraga, nkaraara kûmwinîra ûtukû, na ndoombe Mûrungu ûrîa ûntûûragia mwoyo.

⁹Ndîûria Mûrungu ûrîa ûmbonokagia atîrî, “Nîmbi îtûmîte ûûrîrua nî ni? Nîka ngaatûûra ndiithikîîrîte nîûntû bwa kûthangîkua nî anthû?”

¹⁰Ndiigua ûrûrû mwanka maîndîîndîne nîûntû anthû baakwa nooka bagûnkurunga. Barîkara bakîmbûûragia rîonthe atîrî, “Ka Mûrungu waaku arî kû?”

¹¹Nîmbi îtûmîte ûûjûrwa nî kwithikîîra gwe nkoro yaakwa? Nîmbi îtûmîte waga thîîrî? Îtîkia Mûrungu na wîtîkie atî nkaamûkumia o kaîrî; nîwe ûteethio bwaakwa bwa akuî, na nîwe Mûrungu waakwa.