Read KIMERU BIBLE PROTESTANT EDITION Zab 44 Bible Online

Zab 44 - KIMERU BIBLE PROTESTANT EDITION bible

Zab 44

¹Nîtwigîtue na matû jeetû Mûrungu; biûjûjû bieetû nî bitwîrîte mathithio jarîa wathithagia matukûûne jaao, îgiita rîa karaaja,

²gwe weengîre mîgongo îrîa îtîgwîtîkîtie na inya yaaku, îndî bau ûrabaanda; wakanûkîrie antû barîa batîkwijî, îndî bau ûrabaa thîîrî nthîgûrûûne.

³Nîkwîthîrwa tî nchiû ciaao baatuunyanîre nthî nacio; na tî inya yaao yaatûmîre boombana; Îndî nî inya yaaku, na ûûmbani bwaaku, na kwîthîrwa ûrî amwe nabo; nîkwîthîrwa gwe nî wagwîragua nîbo.

⁴Gwe nîgwe mûnene waakwa na nîgwe Mûrungu waakwa; nîgwe ûûmbanagîîra nchiarwa cia Jakubu.

⁵Nîgwe ûtûmaga tûûmba anthû beetû; tûkinyangaga maitha jeetû riîtweene rîaaku.

⁶Tî ûta bwaakwa mbîtîkîtie, ningî rûchiû rwaakwa rûtîûmba kûmbonokia.

⁷Îndî gwe nîgwe ûtwonoketie kuuma kîrî anthû beetû, na nîgwe wangaratanîtie barîa batûthwîre.

⁸Naatuî tûrîtua gûkumagia Mûrungu magiita jonthe, ningî tûkaamûkaathaga kenya na kenya.

⁹Îndî nandî ûtûrekeeretie buru na wareka tûthawa, na nî ûregete gwîtania ndweene amwe na njûûrî cieetû.

¹⁰Ûrekete twengwa nî anthû beetû, nabo nî bataîte into bieetû.

¹¹Ûrekete twathînjwa ja ng'ondu, na watûnyagia nthîgûrû ngeni.

¹²Wendetie antû baaku ûgûri gûtîbu, na gûtî baita wonete kuumania na bu.

¹³Ûtûmîte twatuîka antû ba kûthûmbagua nî atûûri beetû; antû ba kûthekagîrwa na kûmenagwa nî barîa batûthiûrûkîrîte.

¹⁴Ûtûmîte twatuîka antû ba kûguutagwa nî mîgongo îngî; antû ba kwonanagîîrua nî mîgongo îngî.

¹⁵Ntindaga mbînîkîte ûthiû mûthenya junthe; ntîûmba gûûkîîria mûtwe nî nthoni,

¹⁶nîûntû bwa kwigagua ûrîa nkûthûmbua na ûrîa ngûcikûûrwa; nîûntû bwa kwona anthû baakwa na eendi kwirîîria.

¹⁷Jaja jonthe nî jatwîjîîrîte kinya këethîra tuî tûtîûrîrîtue nîgwe, kana tûthûûkia kîrîkanîro gîeetû naagwe.

¹⁸Nkoro cieetû itîgarûkîte, kana makinya jeetû jeebaeba njîreene yaaku,

¹⁹îndî nî ûtûtiganîrîtie kîrî nyamû ndîîjani, na watûkunîkania na muundu jûmûnene.

²⁰Tûrîngîîthîrwa tûûrîrîtue nî Mûrungu weetû, kana tûgatambûrûkia njara cieetû tûkîthaathayia mûrungu jûngî rî,

²¹Mûrungu arîngîrega kûmenya ûrîa gûkari, nawe nî aijî mawitho ja nkoro cieetû?

²² Arî mma! Tûrîtinda kûûragwa mûthenya junthe nîûntû bwaaku; nîkîo gîtûmîte tûjûkua ta ng'ondu cia kûthînjwa.

²³Ûkîîra MWATHANI! Nîmbi îtûmîte ûmama? Ûkîîra! Ûgáatûrekeeria mwanka kenya!

²⁴Nîmbi îtûmîte witha ûthiû bwaaku? Nîmbi îtûmîte ûûrîrua nî mathîîna jeetû na kûthangîkua gweetû?

²⁵Nandî nkoro cieetû irî nthî tîîriine; twînamîîrîtie mwanka mîîrî yeetû yarûmatana na mûthetu.

²⁶Ûkîîra wîje ûtûteethie! Twonokie nîûntû bwa kîaao gîaaku kîrîa gîtîthiraga!