Read KIMERU BIBLE PROTESTANT EDITION Zab 45 Bible Online

Zab 45 - KIMERU BIBLE PROTESTANT EDITION bible

Zab 45

¹Nkoro yaakwa gaîkûtherûka biugo bibithongi; rwîmbo rûrîa ngûtunga nî rwa kwinagîrwa mûnene; rûûme rwaakwa nî ja karamu ka mwandîki ûrî mpwîî.

²Gatîgatî ka arûme, gwe nîgwe mûthongi nkûrûki ya bonthe; rîrîa ûkwaria no mîgwî yumaga kanyua gaaku; ûu nî kwonania atî ûrî na kîtharimo kîa Mûrungu magiita jonthe.

³Ikundîke, rûchiû rwaaku rûcuure kîero; gwe nchamba ya ndwaa umagara na mwago jwaaku na ûnene bwaaku!

⁴Umagara wîtithîtie mbarathi ya mûnene ûrî na ûchamba, ûrûngamîîre ûûma na îota; njara yaaku ya ûrîo îrothithia mantû jamanene!

⁵ Mîgwî yaaku nî îmîûgî; îrîratha anthû ba mûnene îgakinyîra nkoro ndeene; nî ûkinyangîrîte mîgongo nthî.

⁶Ûnene bûrîa ûetwe nî Mûrungu nî bwa gûtûûra kenya na kenya; waathani bwaaku nî bwa îota.

⁷Wendeete waagîru na nî ûthwîre kûthithia ûrîa gûtîagîrîte; Kîu nîkîo gîtûmi Mûrungu, tawe Mûrungu waaku, akûthuurîte gatîgatî ka bangî, na aagwîtûûrîria maguta aakûa gîkeno.

⁸Nguû ciaaku no marashi ja udi na manemane ikûeera; aini barîkwinîra na inanda bia ndigi ûrî nyomba igemetue na mîgwongo.

⁹Aarî ba anene nî bamwe ba aka ba gîkaro gîaaku; mûka-mûnene arûngamaga rûteere rwaaku rwa ûrîo agemetue na into bia thaabu ya Ofiri.

¹⁰Thikîîra gwe mwarî; kiinda gûtû wigue; ûrîrua nî antû beenu na nja ya abaagu,

¹¹nawe mûnene akairirîria ûthongi bwaaku; nîûntû nîwe mwathi waaku, mwathîkagîre.

¹²Antû ba Tiro barîa atongu buru, bagaakûreetagîra biewa bagîcwa kwona wega kîrî gwe.

¹³Mwarî wa mûnene nîatîa arî ûmûthongi! Arî nyomba yaawe ndeene eekîrîte nguû igemetue na thaabu.

¹⁴Areeti kîrî mûnene eekîri nguû ingemie bwega; aringîîrîtue nî aarî, agwati ba mûranû, bathingatene barî nyuma yaawe. Batongeeretue bagîkungûagîra bakenete.

¹⁵Nooka bagûkûngûîra bakenete Nîatîa barî na kûgwîrua gûkûnene bagîtonya gîkaro kîa mûnene.

¹⁶Antûûne a biûjûjû bieenu, ataana baaku nîbo bakaathanaga; gwe ûkaabaethia athani nthîgûrû cionthe.

¹⁷Ngaatûma nkuma yaaku îtûûre o nthukîîne cionthe; nîûntû bûu antû bagaatûûra bagûkumagia kenya na kenya.