Read KIMERU BIBLE PROTESTANT EDITION Zab 46 Bible Online

Zab 46 - KIMERU BIBLE PROTESTANT EDITION bible

Zab 46

¹Mûrungu nîwe giiciitho gîeetû na nîwe inya yeetû; nî atûteethagia îgiita rîa thîîna.

²Tontû bûû, tûtîkîra kinya nthî îgakuûka, kinya irîma bigatuîka bikagwa îrieene ndeene;

³kinya rûûjî rwa îria rûkeethîrwa rûkîruumaga na rûkîritaga maûûjî, nabio irîma bikagitagita, tûtîmaka.

⁴Kûrî tûmîuuro twa rûûjî tûreetagîra ntûûra ya Mûrungu kûgwîrua. Ntûûra îîu nîkîo gîtûûro kîa Ûrîa Ûrî Îgûrû buru.

⁵Mûrungu arî ntûûreene îîu, nayo îtîûmba kwenyeenyua; Mûrungu akamîteethagia mbere ya gûkîa.

⁶Mîgongo îmakaga îkainaina; najo moonene jakaragana. Mûrungu agoondokaga, nthîgûrû îkarerûka.

⁷MWATHANI Mweneinya arî amwe naatuî; Mûrungu wa Jakubu nîwe kîmatûkîro gîeetû.

⁸Njûûni bûcionere ûrîa MWATHANI athithîtie; bwoone mantû ja kûmakania jarîa athithîtie nthîgûrûûne.

⁹Nîwe ûthiragia ndwaa nthîgûrûûne kunthe; akaunanga moota na gûciicanga matumo, na kwîîthia rong'o.

¹⁰“Borereeni na bûmenye nî ni Mûrungu! Nî ni mbathanaga mîgongoone; na ngakumua nthîgûrûûne!”

¹¹MWATHANI Mweneinya arî amwe naatuî Mûrungu wa Jakubu nîwe kîmatûkîro gîeetû.