Read KIMERU BIBLE PROTESTANT EDITION Zab 48 Bible Online

Zab 48 - KIMERU BIBLE PROTESTANT EDITION bible

Zab 48

¹MWATHANI nî ûmûnene na nî abuîrîte gûkumagua mono ntûûreene ya Mûrungu weetû; kîrîmeene kîaawe gîkîtheru.

² Kîrîma kîa Zaiûni nîkîo gîkaro kîa Mûrungu; ntûûra ya mûnene wa anene; îthûngûki na nî înthongi; nîyo kûgwîrua kwa nthîgûrû yonthe.

³Ndeene ya nthingo ciaayo, Mûrungu nî onanîtie atî we nî giitiiro gîkîriku.

⁴Anene boothûranîre, baragwatanîra kûmiithûkîra.

⁵Îndî baamîona na meetho akî, baraama; baroojûrwa nî ûguaa, baramatûka.

⁶Baagwatîîrwe nî kîmako o, baraangaîka ja mûka akîeewa mwana.

⁷MWATHANI aabathirîrie buru, ta ûrîa ruuo rwa bwa gaiti ruunangaga meri cia Tarishishi.

⁸Tûtwîre kwigua, îndî nandî nî tûrîîkîtie gûcionera mantû jongwa, tûrî gûkû ntûûreene ya MWATHANI Mweneinya; gûkû ntûûreene ya Mûrungu weetû, îrîa Mûrungu agaatûûra amenyeerete mwanka kenya.

⁹Nî tûthûgaanagia bwa kîaao gîaaku kîrîa gîtîthiraga gwe Mûrungu, tûrî ndeene ya kîûrû.

¹⁰O ta ûrîa riîtwa rîaaku gwe Mûrungu riijîkeene, nou nkuma yaaku îtaambîte mwanka mîthia yonthe ya nthîgûrû. Njara yaaku ya ûrîo yûjûri ûûmbani.

¹¹Kîrîma kîa Zaiûni kîrogwîragua! Ntûûra cia Juda irogwîragua nîûntû bwa matua jaaku ja ûûma!

¹²Riûnganieni na ntûûra ya Zaiûni, mîthîûrûkeni yonthe bûgîtaraga mînaara yaayo.

¹³Tegeeni bwega nthingo ciaayo; îteni bûgîtonyaga nyomba ciaayo cia gwitiira irîa ciaaki ikarika nîkenda bûkoomba kwîraga nthukî irîa îbûthingatîte atîrî,

¹⁴“Ûûjû nîwe Mûrungu; nîwe Mûrungu weetû mwanka kenya na kenya; nîwe ûgaatûtongagîîria magiita jonthe.”