Read KIMERU BIBLE PROTESTANT EDITION Zab 49 Bible Online

Zab 49 - KIMERU BIBLE PROTESTANT EDITION bible

Zab 49

¹Igueni bûbû, buî antû ba mîgongo yonthe! Thikîîreeni bwega, buî bwinthe barîa bûtûûraga gûkû nthîgûrû,

²buî barîa anini na barîa anene; buî itonga na buî nkîa.

³Nteto irîa nkweejana na kanyua gaakwa nî cia kîrîra; nkoroone yaakwa kûrî na ûciûku bwa mantû.

⁴Ngaakindîra njuno gûtû gwaakwa, naani mîtaûre nkiinaga na kînanda kîa ndigi.

⁵Nîmbi îgûtûma nkîra rîrîa kûrî na ûgwati; rîrîa barîa banyamaaragia bancîgîîria barî na ûthûûku naani;

⁶nîbo antû barîa beetîkîtie ûtonga bwaao, barîa baikumagîria wingî bwa into biaao?

⁷Nî mma gûtî muntû ûûmba gwikûûra wengwa; gûtîkîo muntû oomba kûrîa Mûrungu kîng'aneene na mwoyo jwaawe.

⁸Nîkwîthîrwa mwoyo jwa muntû nî gîntû kîa goro mono, na gûtî gîntû muntû oomba kûrita gîa kûng'ana,

⁹kenda we atûûra mwoyo na atîgakue kenya na kenya.

¹⁰Gûtî we ûtiijî atî kinya barîa boome mono nî bakuujaga; barîa batîûmîi na biaa, bonthe no gûkua bakuujaga, bagatigîra mootonga jaao antû bangî.

¹¹Mbîrîra irîa bathiki nîcio cieejaga itûûro biaao îgiita rîtî mûthia, kinya këethîra kûrî rîo nthîgûrû ciaao ciaijîkeene na mariîtwa jaao.

¹²Muntû atîûmba gûtûûra o nîûntû bwa ûnene bwaawe; we na nyamû bakuujaga o ûmwe.

¹³Ûjû nîu gûkaraga kîrî barîa baciîtîkagia na waa; nîu gûkaraga kîrî barîa bang'anagîrwa nî ûtonga baao.

¹⁴Beerekeretue gwa akuû ja ng'ondu, nawe mûrîîthi waao nî gîkuû. Barîa baagîru nîbo bakaaethua anene baao gwakea; mîîrî yaao îkoora ntûtî îthire; gwa akuû nîku bagaatûûraga.

¹⁵Îndî Mûrungu akoonokia mwoyo jwaakwa kuuma gîkuûne, nîkwîthîrwa akaambîtîkîra.

¹⁶Ûkámaka nî kwona muntû agîtonga, woona ûtonga bwa nja yaawe bûkîongeereka.

¹⁷Nîkwîthîrwa rîrîa agaakua, gûtî gîntû ageeta nakîo; ûtonga baawe bûtîmûthingata mbîrîreene.

¹⁸Kinya këethîra rîrîa arî mwoyo aigagua ang'anîri buru; amwe na nkuma agîîjaga nîûntû bwa jarîa oombîte kwithithîria;

¹⁹no mwanka athingaate biûjûjû biaawe gwa akuû, kûrîa batîkoroona weerû bwa riûa kaîrî.

²⁰Muntû atîûmba gûtûûra o nîûntû bwa ûnene bwaawe; we na nyamû bakuujaga o ûmwe.