Read KIMERU BIBLE PROTESTANT EDITION Zab 50 Bible Online

Zab 50 - KIMERU BIBLE PROTESTANT EDITION bible

Zab 50

¹MWATHANI, Mûrungu Mweneinya eetaga antû bonthe barîa barî nthîgûrûûne, barîa batwîre nthîgûrûûne kunthe.

²Mûrungu athaaraga ta riûa, arî ntûûreene ya Zaiûni ntûûra îrîa nthongi mono.

³Mûrungu weetû eejaga îndî atîîjaga akiri; eejaga atongeeretue nî rûmûrî rwa mwanki, na athiûrûkîri nî kîbuubani.

⁴Etaga îgûrû na nthî, nîkenda biaa akuujî baawe rîrîa akûgambithia antû baawe.

⁵Ariuga atîrî, “Mbîtîreeni antû baakwa barîa bambîtîkîtie boothûrane amwe. Bau nîbo baaritîre kîgongwana tûreekanîra kîrîkanîro nabo.”

⁶Îgûrû rîtûmagîîria atî: Mûrungu nî ûmwagîru na nîwe ûgiitanagîra îgamba.

⁷“Antû baakwa, nthikîîreeni bwigue ûrîa nkuuga nkaabûthitanga nîûntû bwa mantû jeenu. Ni nî ni Mûrungu, na nî ni Mûrungu weenu.

⁸Ntîgûgûtetia nîûntû bwa kûnditîra igongwana nî ûnditagîra igongwana bia gwakîîria magiita jonthe.

⁹Îndî ûûni ntî na bata na ndeegwa, kana nthenge ciaaku.

¹⁰Nîkwîthîrwa nyamû cia kîthaka cionthe nî ciaakwa, na kinya ng'ombe inyiingî irî irîmeene no ciaakwa.

¹¹Nyoni cionthe nî ciaakwa, na birîa bionthe birî nthîgûrûûne nî biaakwa.

¹²Nkëeja kwigua mpara ntîkwîra; nîkwîthîrwa nthîgûrû yonthe na birîa bionthe birî ku nî biaakwa.

¹³Nîka ndîîjaga nyama cia ndeegwa, kana nyua tharike ya mbûri?

¹⁴Ûbuîrîte kûritagîra Mûrungu kîgongwana gîa nkaatho, na kûûjûragia mîciîtio îrîa ûciîtagîria Ûrîa Ûrî Îgûrû buru.

¹⁵Wankaîra îgiita rîa thîîna ngaakwonokia naagwe ûgaankumagia.”

¹⁶Îndî Mûrungu arîîra barîa baaî atîrî, “Bûtîbuîri kwaragia nteto cia maathana jaakwa kana cia kîrîkanîro gîaakwa.

¹⁷Nîkwîthîrwa buî bûtiigagua ûrîa mbwîraga, na bûtîtindanagîîra na nteto irîa mbwîraga.

¹⁸Bweejaga acoore ba aamba, bûgatuma mûûrû na athûngîîri.

¹⁹Bwaragia nteto imbîî akî bûtiigwataga bûkîaria ûrongo.

²⁰Bûkaraga nthî kwaria mantû jamaaî ja antû beenu; bûgacaambia barîa bûciaranîrîtue nabo.

²¹Bûthithagia mantû jau nkiri ntîkwaria. Mbuga bûrathûgaanagia nkari taabuî, îndî nandî ga nkûbûthitanga nkîbûtetagia.

²²Nandî buî bûtîtindanagîra naani, menyeni ûu ntîkéeje kûbûthiria na bûtîona wa kûbûteethia.

²³Kîgongwana kîrîa kîngwîragia nî muntû kwîthîrwa arî na nchûne; muntû ûrîa ûrî mîîtîre yaagîrîte nîwe nkoonokia.”