Read KIMERU BIBLE PROTESTANT EDITION Zab 51 Bible Online

Zab 51 - KIMERU BIBLE PROTESTANT EDITION bible

Zab 51

¹ (Zaburi ya Daudi, rîrîa kîroria Nathani eetîre kûmwona nyuma ya Daudi kûthûûngîîra na Bathisheba.) Mbigîîrua kîaao itû Mûrungu, nîûntû bwa kîaao gîaaku kîrîa gîtîthiraga; nîûntû bwa kîaao gîaaku gîkînene, angûra meeyia jaakwa.

²Nthambia buru, maatia jaakwa jathire, ûntherie, mbîthîrwe ntî na meeyia.

³Nîkwîthîrwa nî mbijî maatia jaakwa, na ntîûrîrîtue nî meeyia jaakwa.

⁴ Mbîîtie kîrî gwe; o kîrî gwe gwenka, ndathithia mantû jarîa uugîîte nî jamathûûku. Tontû bûû, nî ûngitîrîte îgamba ûrîa kwagîrîte; na nî ûnkanûkîîtie bwega.

⁵Gûtî nkaanja, ntwîre ndî mwîyia kuuma ndîgûciarwa; ndaaere mwîyia kuuma ndî kîu kîa maama.

⁶Weendaga muntû eethîrwa arî mwîtîkua na arî ûûmeene nditana mpûmîe.

⁷Nthambia na matî ja makuuû, naani nkaathera. Ntheria, naani nkeerûa o ta nkamia.

⁸Tûma ngwîrague na mbîthagîrwe ndî na nkerû; na kinya këethîra nî uunangîte marûitû jaakwa, ngaakena.

⁹Ukáraithîîria meeyia jaakwa, na wangûre maatia jaakwa jonthe.

¹⁰Mpûûmbîra nkoro întheru, itû Mûrungu, na ûmpe mwoyo jûmwerû.

¹¹Ûgámpînga mpuuma kîrî gwe; na ûgántuunya Roho waaku Ûmûtheru.

¹²Ncokeria kûgwîrua kûrîa kuumanagia na wonokio bwaaku, na ûtûme mbîthîrwe ndî na nkoro ya kwathîka.

¹³Naani nkaaritana eeyia Waatho bwaaku, nabo bagaacoka kîrî gwe.

¹⁴Mboonokia kuuma meeyiene ja kûûragana, itû Mûrungu; Gwe nîgwe Mûrungu ûrîa ûmbonokagia; naani ngaakûgongaga nîûntû bwa wonokio bwaaku.

¹⁵Itû MWATHANI, mpa inya ya kwaria, naani ngaagûkumagia.

¹⁶Nîkwîthîrwa gwe tî kîgongwana gîkûgwîragia; na tî igongwana bia gwakîîria wendaga, nîûntû këethîra nîbio wendaga, nî ka nkûritîra.

¹⁷Kîgongwana kîrîa Mûrungu eendaga nî muntû wiinyiîtie; muntû ûrîa wiinyiîtie na wirirîte, gwe Mûrungu ûtîkoromûmena.

¹⁸Itû Mûrungu, teethia antû ba Zaiuni; baake nthingo cia Jerusalemu kaîrî.

¹⁹Rîu nîrîo ûkaagwîragîrua igongwana birîa biagîrîte; na ûgwîragîrue igongwana bia gwakîîria; nacio ndeegwa ikaaritagîrwa kîritîroone gîaaku kîa igongwana kaîrî