Read KIMERU BIBLE PROTESTANT EDITION Zab 57 Bible Online

Zab 57 - KIMERU BIBLE PROTESTANT EDITION bible

Zab 57

¹ (Zaburi ya Daudi rîrîa aamatûkîre Saûlû kuuma gîkurunguune.) Mbigîîrua kîaao itû Mûrungu, mbigîîrua kîaao. Nîkwîthîrwa matûkîte nîkenda mbiciitha kîrî gwe; ndiiciitha kîrî gwe ta ûrîa tûchui twa ngûkû twiciithaga mathaguune jaayo mwanka kîrûngûûjû kîa thîîna kîthire.

²Nkaagîra Mûrungu Ûrîa Ûrî Îgûrû buru nawe akambûjûrîria moobatu jaakwa.

³Agatûma ûteethio kuuma îgûrû, ambonokie. We agaakanûkia barîa beenganaga naani nîkenda bambûraga. Mûrungu nîwe wa gwîtîkîka na ampendeete na wendo bûrîa bûtîthiraga.

⁴Ntûûraga gatîgatî ka anthû; bakari ta mbiti irîa irîîjaga antû maîgo jaao jakari ta matumo kana mîgwî, ndûûme ciaao ikari ta nchiû injûgî.

⁵Itû Mûrungu ûrokumua kûu îgûrû na nthîgûrû îkoojûra ûkumio bwaaku!

⁶Baankûmîîre mîtego baranthiria inya. Baampînjîîre marinya îndî baragwa ku bongwa.

⁷Itû Mûrungu, ngwîtîkîtie mono! Ngaakwinagîra ndwîmbo cia gûgûkumia.

⁸Ngookîîra njûkie wandîîndî na kînanda; mbine mwanka gûkîe.

⁹Ngagûcokagîria nkaatho itû MWATHANI ndî gatigatîîne ga kîrîndî. Ngakwinagîra ngîgûkumagia ndî gatîgatîîne ka mîgongo.

¹⁰Nîkwîthîrwa kîaao gîaaku nî gîkînene giitîîtie gîakinya îgûrû; na gwîtîkîka gwaaku, gwaakinya matuune.

¹¹Itû Mûrungu ûrokumagua kûu îgûrû, na nthîgûrû îkoojûra ûkumio bwaaku!