Read KIMERU BIBLE PROTESTANT EDITION Zab 59 Bible Online

Zab 59 - KIMERU BIBLE PROTESTANT EDITION bible

Zab 59

¹ (Zaburi ya Daudi rîrîa Saûlû aatûmîre antû beeta nja ya Daudi nîkenda booraga Daudi.) Itû Mûrungu ntunyûkia kuuma kîrî anthû baakwa ûnkarie kuuma kîrî barîa bambithûkîrîte.

²Mbonokia kuuma kîrî barîa baaî ûntuunyûkie kuuma kîrî ooragani.

³Tega ûrîa antû babaaî bambiciithîrîte; ûrîa anthû bankabîrîte bakîenda kûmbûraga na gûtî ûthûûku nthithîtie.

⁴Kinya gûtî u nthithîtie bûbûûî anthû nî bakwithuranîra nîkenda bambithûkîra; Itû MWATHANI nteethia!

⁵Itû MWATHANI Mûrungu Mweneinya; gwe Mûrungu wa Israeli, kanûkia mîgongo îngî yonthe na ûkaigîîrua barîa babangaga ûthûûku kîaao.

⁶O ûgoro, o ûgoro, anthû bacokaga ntûûreene, bathiûrûkîte bakîgambaga ta kurû.

⁷Igua ûrîa bakûrumana, nteto ciaao irîtemana ta nchiû. Barîciîra atîrî, “Gûtî we ûkwigua ûrîa tûkuuga.”

⁸Îndî gwe MWATHANI nî ka ûbathekagîra ûthekagîra mîgongo îrîa îtîgwîtîkîtie.

⁹Itû Mûrungu nîgwe giitiiro gîaakwa, nîgwe inya yaakwa, na nîgwe mbîrîgagîîra.

¹⁰Mûrungu waakwa nî ampendeete na aganteethia; agaatûma mbone anthû baakwa bakîthirua.

¹¹Itû Mûrungu ûkábooraga antû baakwa batîkeeje kûûrîrua nî ûntû bûu; amba ûboonjie ûrîa batîûkîîra kaîrî, itû MWATHANI mûkaria weetû.

¹²Nîkwîthîrwa nî arongo, barorigicanua nî rwikumio rwaao! Nîkwîthîrwa nî arumani na arongo,

¹³ûrobathiria na mûthûûro. Bathirie buru, nîkenda antû ba nthîgûrû cionthe, bamenye atî Mûrungu nîwe waathanaga Israeli.

¹⁴O ûgoro, o ûgoro, anthû bacokaga ntûûreene, bathiûrûkîte bakîgambaga ta kurû.

¹⁵Bathiûrûkaga ta kurû bagîcwaga biakûrîa, baarega kûnyira bakaambîrîria kûringa gîtuma.

¹⁶Îndî ni ngaagûkumagia nîûntû bwa inya yaaku; na ngûkumagie o rûkîîrî nîûntû bwa kîaao gîaaku kîrîa gîtîthiraga. Nîkwîthîrwa gwe nîgwe giitiiro gîaakwa nîgwe giiciitho gîaakwa îgiita rîa thîîna.

¹⁷Itû Mûrungu nîgwe giitiiro gîaakwa; nîgwe giitiiro giaakwa; na nîgwe mbîrîgagîîra, naagwe nî ûmpendeete.