Read KIMERU BIBLE PROTESTANT EDITION Zab 66 Bible Online

Zab 66 - KIMERU BIBLE PROTESTANT EDITION bible

Zab 66

¹Inîreeni Mûrungu bûgwîrîtue buî antû ba nthîgûrû yonthe;

²mwinîreni bûkîgongaga riîtwa rîaawe; mûkumagieni na bûkîmûkaathaga!

³Îîreeni Mûrungu atîrî, “Mathithio jaaku nî ja kûrigaria! Ûrî inya înene, îrîa îtûmaga anthû baigwîthia kîrî gwe nîûntû bwa gûgûkîra.

⁴Nthîgûrû yonthe nîgwe îthaathagia; antû bonthe bainaga bagîgûkumagia bainaga bakîgongaga riîtwa rîaaku.”

⁵Njûûni bwoone ûrîa Mûrungu athithîtie; athithîtie mantû ja kûrigaria kîrî antû.

⁶ Aathûranîre îria rîraa nthî înjûmo; araathûrana rûûjî antû barauna mûuro na magûrû; naatuî tûragwîrua nîûntû bwaawe.

⁷Atumagîra inya kwaathana magiita jonthe; na gûtî u mîgongo yûmba kûthithia atîene. Ûkáreka barîa baregeete gûkwathîkîra boona gîa gwikumîria.

⁸Kumieni Mûrungu weetû buî antû ba mîgongo îngî; mûkumieni na inya mwanka antû baigue.

⁹Mûrungu nîwe ûtûmaga tûtûûra tûrî mwoyo, na atîenda gûtûrekeeria tûûmbwa.

¹⁰Gwe Mûrungu ûtûgeragia o ta ûrîa fetha îrerûragwa na mwanki.

¹¹Ûrekeete twagwa mûtegoone, watûkamatithia mîrigo îmîrito.

¹²Waarekere tûrakinyangwa nî anthû, tûratonya thîîneene înene îkari ta mwanki kana maburiko; îndî nandî nî ûtûreteete antû aeega ûthinyariine.

¹³Ngeeta kîûrûûne nkûritîre kîgongwana gîa gwakîîria mbûjûrie mîciîtio îrîa ngûciîtîrîtie.

¹⁴Mîciîtio îîu ndaagûciîtîîrie rîrîa ndaarî thîîneene.

¹⁵Ngaakûritîra igongwana bia nyomoo irîa njega buru nkûritîre ntûrûme, ndeegwa, na nthenge.

¹⁶Njûûni buî bwinthe barîa bûthaathagia Mûrungu bûthikîîre bwigue ûrîa Mûrungu anthithîrîtie.

¹⁷Ndaakaîîre Mûrungu nkîmwinagîra ndwîmbo.

¹⁸Keethîra ndaaugîre atî ntî na meeyia MWATHANI atîngî nthikîîra.

¹⁹Îndî nandî Mûrungu nî ambigîîtue, ancokeria îromba rîaakwa.

²⁰Mûrungu arokumua, nîkwîthîra nî acokeetie îromba rîaakwa, na gûtî rîo wendo bwaawe kîrî ni bwathira.