Read KIMERU BIBLE PROTESTANT EDITION Zab 68 Bible Online

Zab 68 - KIMERU BIBLE PROTESTANT EDITION bible

Zab 68

¹Njû Mûrungu ûnyaganie anthû baaku; ûtûme barîa bakûthwîre boombwe bamatûke.

²Ûbaurute ta ûrîa toogi yurutagwa nî ruuo, ûbarerûre ta ûrîa mûûra jûrerûragwa nî mwanki, kûrege kwonora barîa baaî kîrî Mûrungu.

³Îndî tûma barîa baagîru bagwîrague barî mbere yaaku; bakene na bakûngwîre.

⁴Inagîreeni Mûrungu, bûkumagie riîtwa rîaawe; mûthithîrieeni njîra îmbariî we ûrîa wîtagîîra matuune; Riîtwa rîaawe nî MWATHANI; mûkûngwagîreeni bûrî mbere yaawe.

⁵Mûrungu nîwe ûmenyagîîra aana barîa batî na aciari na agakaria ntigwa arî gîkaroone kîaawe gîkîtheru.

⁶Mûrungu nî aejaga barîa batî gîkaro gûntû gwa gûtûûra; nî atûmaga barîa barî ncheera barekeerua; îndî ndemi itûûraga rwanda rûrûûmo.

⁷Gwe Mûrungu, nî waatongeeretie antû baaku; rîrîa baagiitanîrîtie rwanda.

⁸ Nayo nthî îrainaina na ngai îraura. Mûrungu wa Israeli areenama, kîrîma gîa Sinai kîrainaina mbere yaawe.

⁹Itû Mûrungu uurithagia ngai înene rîrîa nthîgûrû yaaku yûûmagari.

¹⁰Antû baaku nî boonere gîtûûro ku, nîûntû ûrî ûmwega, nî waamenyereere nkîa.

¹¹MWATHANI nî aatûmanîre; nabo aka babaingî bareerana nteto iu, bakiugaga atîrî,

¹²“Anene na njûûrî ciaao baakûmatûka buru,” na into birîa birî kambîîne ciaao bigatawa nî aka ba Israeli.

¹³Kinya barîa bakaraga bakarîtie ng'ondu, bakoona fetha na thaabu îrîa njega buru.

¹⁴Rîrîa Mûrungu Mweneinya aanyagîrie anene, nkamia nî yaagwîre kîrîmeene gîa Zalimoni.

¹⁵Kîrîma kîa Bashani, nî gîa kûrigaria, kîrî ngoji inyiingî, kîrîma kîa Bashani.

¹⁶Gwe kîrîma kîa Bashani, nîkî ûntû ûkwigîîrua Zaiûni, kîrîma kîa MWATHANI rûriitho? Zaiûni nîkîo kîrîma kîrîa MWATHANI athuurîte gûtûûra mwanka kenya.

¹⁷MWATHANI aumîte kîrîmeene gîa Sinai arî na ngiri inyiingî cia ngaarî cia ndwaa.

¹⁸ Agiitia kîrîmeene, nî aarî na atae babaingî bamûthingatîte; ndemi nî ciaamweejaga biewa. MWATHANI Mûrungu atûûraga irîmeene.

¹⁹MWATHANI arokumua, we ûtûnogokagia mîrigo yeetû ntukû cionthe; Mûrungu nîwe mwonokia weetû.

²⁰Mûrungu weetû nî oonokanagia; Mweneinya Mûrungu nîwe ûtwonokagia kuuma gîkuûne.

²¹Îndî Mûrungu akaathiria anthû baawe buru; athirie barîa batîtigaga mîîtîre îmîthûûku.

²²MWATHANI augîîte atîrî, “Nkaarita antû ba Israeli kuuma kîrîmeene kîa Bashani; mbarîte îrieene ndeene.

²³Naabuî bûgaatobia tharike yaao na kurû cieenu imîcûne.”

²⁴Gwe Mûrungu mûnene weetû ûtongeeria kîrîndî kîûmbeene ndweene; kîthingatanîte gîîtîte kîûrûûne gîaaku.

²⁵Aini beetîte, barî mbere baathingatwa nî aarî bakîringaga tamburini; nabo baathingatwa nî aringi ba inanda.

²⁶Bainaga bakiugaga atîrî, “Kumagieni Mûrungu rîrîa bûûthûranîte bûkîmûthaathagia, Buî bwinthe antû ba Israeli bûkumagie MWATHANI rîrîa bûûthûranîte.”

²⁷Antû ba mwîrîga jwa Benjamini nîbo batongeeretie kinya bëethîrwa nî babakai. Baathingatwa nî atongeeria babaingî ba mwîrîga jwa Juda bau nabo baathingatwa nî atongeeria ba mwîrîga jwa Zebuloni na jwa Nafutali.

²⁸Onania inya yaaku itû Mûrungu; wonanie inya yaaku îrîa waatûmbanîîrîre nayo.

²⁹Nabo anene bakaareetaga biewa biaao kîrîmeene gîaaku kîrîa kîrî Jerusalemu.

³⁰Kanûkia Misri îrîa îkari ta nyamû ya îriimba, ûkanûkie mîgongo îngî îrîa îkari ta ndeegwa ciungene na njaû, ûtûme bau bakûthaathagie, bakûreetagîre fetha ciaao. Aragania mîgongo îrîa yeendeete ndwaa.

³¹Antû bau nî bareete îturutia kuuma Misri; nabo antû ba Ethiopia bakûthaathayie.

³²Inîreeni Mûrungu buî moonene jonthe, kumieni MWATHANI na ndwîmbo.

³³Bûmûkumagie we ûrîa wîtagîîra îgûrû; îgûrû rîrîa rîa tene. Agaandûkaga kuuma ku ta ngorogoro.

³⁴Îîranageeni mantû ja inya ya Mûrungu, we ûrîa waathaga Israeli kunthe, na îgûrû rîkoonania inya yaawe.

³⁵Mûrungu aumîte gîkaroone kîaawe kîrîa kîtheru nî wa kûmakania. Mûrungu wa Israeli aeejaga antû baawe inya na ûchamba. Mûrungu arokumua!